لا مؤاخذة ...حضرتك سنى .... و لا شيعي؟؟

السنة و الشيعة ....الشيعة و السنة...اليومين دول مبقناش نسمع في الاخبار غير عن السنة و الشيعة....كأن السنة و الشيعة دول لسه طالعين اول امبارح مثلا و مكنوش موجودين قبل كده....بصراحة و عارفة انكم هتقولوا عليا جاهلة بس قبل حرب العراق مكنتش اعرف اصلا ان فيه حاجة اسمها سنة و شيعة.... و حتى بعد ما عرفت مكنتش عارفة انا سنية و لا شيعية....و كمان لما عرفت انى سنية مكنتش عارفة انا سنية ليه.
في مرة كنت بصلي الجمعة في الجامع اللي جنبنا و الامام الله......يسامحه بقى كان عايش دور العالم الجليل اللي مجبتوش ولادة... و قعد يقول الحمد لله اننا على سنة الحبيب و الشيعة دول كفار...دول هيتساووا مع الكفار و العياذ بالله يوم القيامة....دول مش مسلمين....دول اليهود احسن منهم... وفضل يقول كلام من اللي متنقي....طبعا انا مسكتش و لساني الطويل مبيتهدش خالص....بعد الصلاة استنيتوا على ناصية الجامع....بس حظه حلو بقى انه كان بيدي درس بعد الصلاة و معترتش فيه...اتكتبلوا عمر جديد....بس من ساعتها مرحتش ناحية الجامع ده تاني و لا بقيت بصلي الجمعة....المهم انا دورت في موضوع الشيعة ده و كنت عاوزة اعرف هما فعلا كفار و لا ناس زينا و لا ايه؟
اللي اكتشفته انهم مسلمين... يا سلاااااااااااام اكتشاف هايل.....طبعا مكنتوش تعرفوا ده......انا قلت ساعتها طيب لو هما حاجة كويسة ليه مبقاش شيعية و اهو امشي على الموضة.....طبعا انتوا متوقعين منى دلوقتي حاجة من اتنين....اولا انى اقولكم انى بقيت شيعية و افضل اقلكم قد ايه احنا مظلومين و ان السنة بيجنوا علينا.... و ثانيا اقلكم بعد بحث و تمحيص لاقيت ان السنة احسن و الشيعة كفار هيروحوا جهنم قريب.
اللي انتوا مكنتوش متوقعينه ان بعد فحص و تمحيص في المسألة دي لاقيت ان معظم السنة اللي بيتكلموا عن الشيعة بيقولوا كلام مش تمام....فقلت طيب اشوف الشيعة نفسهم بيقولوا ايه على نفسهم....و لا قيتهم بيقولوا انهم ناس تمام و السنة متجنيين عليهم و فعلا قريت عن التشيع بس لعلماء شيعة ...مش سنة بيتكلموا عن الشيعة.....و لاقيتهم مش كفار زى ما بسمع.... صحيح فيه حاجات مدخلتش دماغي زي حكاية الامام العسكرى و حكاية الائمة التناشر كلهم....بس غير كده كانوا ناس عاديين خالص.
طبعا انتوا فاكرين انى لما لاقيت الحاجات المهيسة دي عند الشيعة بقيت مقتنعة بسنيتي....بس اللي حصل مش كده....اللي حصل انى بني أدمة و مسلمة...و مش عاوزة اكون شيعية... و مش عاوزة اكون سنية....فرقت ايه الاسامي يعني...يعني معتقدش ان يوم القيامة هيبقى في طابور زي بتاع العيش كده واحد للسنة و التاني للشيعة....و لا حتى كمان الواحد لما يندهوا عليه يوم القيامة هيقولوله يا فلان يا ابن فلانة يا سني و لا يا شيعي.....كمان على حسب معلوماتي ان ربنا بيحاسب الواحد على حسب نيته...يعني متفرقش لو كنت سني و لا شيعي و لا حتى كوالالمبوري....الموضوع مينفعش يبقى سنة تدخل الجنة و شيعة تدخل النار....بصراحة الكلام ده مش واكل معايا....طيب انا مش سنية و لا شيعية هتعملولي ايه يعني؟...هتدخلوني النار و تقولوا عليا كافرة....انا واحدة بصلي و بصوم و بعمل كل الفروض اللي عليا و مش بعمل حاجة حرام....الا النميمة طبعا عشان انتوا عارفين البنات و لسانهم....و انا بحب جدا اهل البيت....و دايما بروح مع ماما نصلي في الحسين و السيدة نفيسة و السيدة زينب....تفتكروا لو واحد سني بس مبيصليش هيروح الجنة؟...اصل هو ده اللي بنسمعه اننا هندخل الجنة بالجرين الكارد لما نكون سنة و اننا مش هنعمر في النار.....يا نهار مش فايت....يعني لو واحد سني بس زي باقى الاخوة اللي مبيركعوهاش و لا يعرفوا طريق الجامع واحد زى ده هيدخل الجنة بالجرين كارد بتاعته و انا هروح النار؟؟؟
ممكن حد دلوقتي يقول انى اتلحست و انى المفروض يقام عليا الحد و الكلام ده....بس بجد يا جماعة ايه الفرق بين دول و دول....مش في الاخر كلنا بنقول نفس الشهادة و بنصلي نفس الصلاة و بنقف قدام نفس القبلة...ايه المشكلة بقى؟
عشان تعرفوا قد ايه انتوا بيضحك عليكوا بلعبة السنة و الشيعة....موجود على النت موقع المفروض ان علماء السنة هما اللي عاملينه لكشف ستر الشيعة الزناديق....و مقسمين الشيعة لفرق و بيقولوا كلام على كل فرقة من اللي متنقي خيار....دول بيحللوا الزنا و دول بيخلوا النساء مشاع و ملهمش حرمة و دول بيحللوا الربا و دول بيعملوا مش عارف ايه....لحد هنا ممكن نعديها...لكن في اخر كل تحليل من التحليلات الجهنمية بتاعتهم لكل فرقة بيقولولك امثلة....الناس عاوزة تخدم برده...الامثلة دي ناس من المعتنقين المذاهب دي....لحد هنا تمام؟...لا مش تمام...الناس دول كلهم سياسيين عراقيين و لبنانيين مشهورين جدا.
فهمتوها و لا لسه....لسه الفول مفعوله شغال و لا راح.....على العموم اللي فهم الفولة زيي اكيد مش هيطالب برقبتي.... و اللي مفهمهاش بقى اعمله ايه....مكتوبلي اموت على ايدين حمار.
و نصيحة في الاخر كده...لو حد قاللك انت سني و لا شيعي...قوله انا مسلم.....و لا متقولوش ...اللي يسأل سؤال زي ده يبقى اصلا حمار

بحب امريكا اه......بكره ادارتها اكيييييد

النهاردة كنت قاعدة مع الحاجة ام فوزي جارتنا ....قلتلها في ساعة صفا كده " ايه رأيك في امريكا يا أم فوزي؟"...... ردت قبل ما اكمل السؤال..... قطعت و قطعت سيرتها.... معرفش ليه ساعتها افتكرت مسرحية المتزوجون لما كان حنفي بيسأل مراته عن فضيحة ووترجيت....بس ما علينا عشان أم فوزى متزعلش....قلتلها باستهبال ليه كده يا أم فوزي هي عمنلتلك حاجة... انا كنت فاكراها هتقوللي البت امريكا تستاهل الفضيحة الصايعة بتاعة الشبان. .... زى المسرحية يعني....بس فوجئت بأم فوزي بتقوللي انتى مشفتيش هي عملت ايه في ابو غريب و قلة القيمة بتاعة العراقيين هناك ده غير اللي بنسمعه عن جوانتانامو....اتضحلي ان ام فوزي على علم بالاحداث و مش بعيد تقدم احداث 24 ساعة كمان شوية فقلت اكمل كلام معاها..... و ايه رأيك يا ام فوزي في بوش....قالتلي ياختي قطع هو راخر الراجل ده عاوز اللي يهده اهو ربنا موجود بقى يهده و نخلص منه..... و بعد حوار طويل مع ام فوزي اكتشفت حاجة مهمة خالص.... غير ان ام فوزي طلعت مثقفة طبعا و ممكن بكرة الاقيها عاملة بلوج بتعلق فيه على الاحداث, ام فوزي زيها زي ناس كتييييير اوى المواضيع عندها داخلة في بعض زي صينية البطاطس بتاعة ماما بالظبط تلاقي فيها حاجات كتير كده مش عارف هي ايه و كلها داخلة في بعضها بس شكلها في الاخر صينية بطاطس...احم احم لكن طعمها بيقى تحفة طبعا مقدرش اقول غير كده و ربنا يسامحني بقى....المهم الناس دلوقتي بقت تدخل امريكا في بوش في الامريكان في الادارة الامريكية في كل حاجة و تحكم عليهم كانهم واحد.... الغلط اللي بنقع فيه كلنا.
يعني امريكا دي دولة زيها زي اي دولة لا بتحل و لا بتربط دي بس مكان كده موجود عليه شوية ناس و موجود على الخريطة.... و بوش ده مجرد رئيس دولة هو المفروض اللي بيحط السياسة اللي بتمشي عليها البلد سواء داخليا او خارجيا.... و الامريكان هما الشعب ناس عادية زيهم زينا طالعان عينهم زينا برده و عندهم بابا و ماما و عمو صلاح البقال و الحاج سيد البواب بالظبط بالظبط زي عندنا.... و الادارة الامريكية دي الادارة اللي فعلا بتمشي البلد و تقول ايه اللي يحصل و ايه اللي يتعمل و بتحدد علاقات امريكا مع الدول التانية و دي بتتغير مع كل رئيس حتى الرئيس الواحد ممكن يغير ادارته براحته.

و بعد المحاضرة المملة احب اجيبلكم من الاخر..... اللي اخد قرار حرب العراق مكنش الشعب الامريكانى و لا امريكا البلد.... اللي اخد الفرار ده هي الادارة الامريكية بتاعة بوش.... اللي بيعذب المساجين اللي في جوانتنامو مش الامريكان لأ دول موظفين في نفس الادارة الامريكية... الخلاصة من الليلة دي كلها... اوعوا تفتكروا ان الامريكان كلهم زي بوش انا لسه قايلالكم انهم عندهم عم سيد البواب يعني ناس زينا.... مش هما اللي بياخدوا القرارات بنفسهم يعني مش هما اللي رموا القنبلة على هيروشيما و لا هما اللي راحوا العراق....دول ناس في حالهم مش همهم اي حاجة من الحاجات اللي بتحصل دي و مش فارقة معاهم و مش موافقين عليها.....صحيح ممكن حد يقوللي طيب ما هما اللي جابوا الحكومة لانهم هما اللي انتخبوا الرئيس بس بذمتكم الكام ميت مليون امريكانى كلهم كانوا يعرفوا بوش ده قبل كده....الحملات الدعائية في الانتخابات بتقول اي كلام عشان تكسب المرشحين و نسبة كبيرة دلوقتي من الامريكان بيضربوا نفسهم بالجذمة عشان انتخبوه و تقريبا نص الشعب غير راضي عنه....
تاني مرة بقى لما تسمعوا خبر وحش بسبب امريكا متقولوش تسقط امريكا و الامريكان دول ولاد مش عارف ايه لا خليك ناصح و اعرف ان دي قرارات حكومة ... لما انت بنفسك تاخد القرار في بلدك تبقى تحاسبوهم ساعتها.... يعني سيادتك مش بتحدد اسعار الكهربا و لا بتحدد تبعت سفرا لانهي دول و لا بتحط ميزانية الدولة و مش حضرتك بنفسك اللي بتروح تستقبل رؤساء الدول اللي بيزورا مصر و تقوم معاهم بالواجب و تعزمهم من جيب أهلك....يبقى اعقل بقى شوية و متكرهش الناس دي لانهم مش وحشيين و مش هما اللي سودوا عيشتك.
اعترض على الادارة نفسها بس متكرهش امريكا.

عقبال البكاري

عمكو روزفلت قال مفيش حاجة في السياسة بتحصل بالصدفة و لو فيه حاجة حصلت اتاكدوا ان كان مترتبلها تحصل كده من زمان.... ممكن حد يقوللي ايه لازمة البقين دول؟...و هي هتتمنظر علينا بيهم و لا ايه.....طبعا انا مش بتاعة منظرة....احم احم مش اوى يعني....بس اصبر عليا شوية و انت تعرف يا استاذ.
و الست جينا اتخطبت ...... طبعا الرخم هيقول دلوقتي انى هيست خالص.....مش بعيد يقول دي خلاص اتهبلت.....ايه علاقة البقين الاولانيين بالست جينا دي....و احنا مالنا اصلا بجينا دي هي كانت من بقيت عيلتنا.......تتجوز و لا تتيل مالناش دعوة.
طبعا يا عم الرخم احب اقلك انى لسه مهيستش و لا اتهبلت.....و ست جينا دي اللي مش عاجباك تبقى جينا جورج بوش.....سكت بقى دلوقتي....مفيش قلة ادب تاني طبعا.
و لان عمك روزفلت قال ان مفيش حاجة في السياسة بتحصل بالصدفة....فطبعا متتخيلوش ان الموضوع عادي .....يعني البنوتة جينا قررت انها تتاهل فجأة كده....و العريس راح البيت الابيض عشان يدخل البيت من بابه و قال لبوش يا عمي انا عاوز اطلب ايد بنتك ....و طبعا رد عليه و قالله احنا بنشتري راجل و الدمعة فرت من عين الحاجة لورا.....و اتفقوا ان خير البر عاجله و يعملوا الفرح الخميس اللي جاي.
تبقوا عبط لو افتكرتوا كده.
الموضوع اكيد بيتخطط له من زمان...اصلها بالعقل كده...جينا تعرف الامور خطيبها ده من 3 سنين....اشمعنى بقى دلوقتي حالا افتكروا انهم عاوزين يتجوزوا....لا و بيقولوا انهم لسه مقرروش هيعملوا الفرح فين....و قال ايه انهم مش عاوزين يعملوه في البيت الابيض و بيفكروا يعملوه في مزرعة باباها في تكساس و البيت الابيض محطوط من ضمن اختياراتهم.....قال يعني الموضوع عادي كده....
المهم عشان بس الواحد ميغلطش....حكاية الجوازة دي مش داخلة دماغي...ده غير اللي قالوا عمكوا روزفلت....
فتلاقوا بوش قال يلهي الشعب بالحكاية دي عشان ينزاحوا من على قفاه...اصلهم كل ما الانتخابات تقرب يهروه يا عيني انتقادات و ساعات شتايم على اللي هببه في فترة رياسته.....ده غير طبعا ان المرشحين واكلين منه الجو دلوقتى و امريكا ملهاش سيرة حاليا غير مين هيكسب الجمهوريين و لا الديموقراطيين... و هيلاري هترجع للبيت الابيض و موقف الحاج كلينتون ساعتها لما يبقى حرم الرئيسة....و الحوارات دي كلها اكيد تعبت نفسية عمكو بوش قال بقى يلهي الشعب شوية و يخليهم يجيبوا في سيرته لاول مرة بالطيب مش بالردي....و مفيش احلى من دي سيرة.... جواز اسطورى ....بنت رئيس دولة تتجوز واحد من الشعب....هو مش من الشعب اوى بس الناس بتحب تسمع الكلام ده....و ازاى الحب بينتصر و البطل و البطلة بيتجوزا في اخر الفيلم.
بس يا عم بوش لو كانت الجوازة دي لغرض في نفسك او لانك اب حنين عاوز يجوز بنته و يخلص منها فانت في الحالتين ضربت كذا عصفور بحجر واحد...يعني برده لما تتطلع من البيت الابيض اللي هيبقى في بق الناس موضوع جواز الامورة الصغيرة و هيدعولك ربنا يقدرك و تجوز اختها كمان.
و ربنا يستر علينا جميعا.

لو بتعرفوا انجليزي يبقى متفوتوش ده

لو تعرفوا كام كلمة انجليزي يبقى لازم تتفرجوا على قناة السي ان ان يوم الاربع 22 اغسطس و الخميس و الجمعة
هيعرضوا برنامج تقارير كرستينا امانبور عنوانه جنود الرب
البرنامج هيتعرض على 3 اجزاء
اول جزء بتاع يوم الاربع الجنود اليهود و تانى جزء يوم الخميس عن المسلمين و تالت جزء يوم الجمعة عن المسيحيين
الساعة 4 العصر و 10 بالليل ده بتوقيت القاهرة و 1300 و 1700 بتوقيت جرينتش
من شكل البرومو كده ان البرنامج فعلا محايد و عارض متطرفين يهود و مسيحيين و مسلمين يعنى مبيغنيش نفس النغمة بتاعة ان المسلمين دول ارهابيين و دينهم بيقلهم اقتلوا الناس و الكلام الاهبل ده اللي دايما بنسمعه على القنوات الامريكية.
بس ربنا يستر بس
متنسوش تتفرجوا عليه.... على فكرة لو دخلتوا على موقع السي ان ان هتلاقوا فيه المواعيد غير اللي قلتلكوا عليها
بس ملكوش دعوة بالكلام الفاضي ده ...... انا بقلكوا على المواعيد اللي شفتها بعيني على القناة النهاردة
و لو كنتوا ملكوش اوى في الانجليزي ميضرش....ابقوا اتفرجوا على الصور و امسكوا قاموس تلقطوا بيه كام كلمة....و ابقوا افتكسوا انتوا الباقي....مش احنا بتوع الفهلوة و لا ايه

أمريكا بتسهبل يا رجالة

اول امبارح امريكا قالت انها هتحط الحرس الثوري الايراني على البلاك ليست بتاعتها...... قايمة المنظمات الارهابية يعني....و دي البعبع اللي ماسكاه لكل عيال المنطقة عشان محدش يقدر يفتح بقه معاها.... و القايمة دي مشرف عليها حركة حماس و الجهاد و حزب الله و القاعدة و كل واحد اتجرأ و رفع عينه في أمريكا..
المهم يا جماعة........ المشكلة دلوقتي ان الحرس الثورى ده تابع لدولة ليها سيادة اللي هي ايران..... و هو من اجهزة الدولة..... صحيح هو مش تابع للجيش بس برده من اجهزة الدولة.... و أمريكا بصراحة كانت حاطة نقرها من نقره من اكتر من عشرين سنة من ساعة ما قامت الثورة......اصل الحرس الثوري هو اللي بيحمي الثورة الاسلامية في ايران بعد ما خلعوا الشاه...... و طبعا اليومين دول انتوا عارفين اد ايه كلمة اسلامية بتعمل حساسية لامريكا ..... و كمان ثورة.....دي قلبت على نزلة شعبية عندها خالص.
خطورة الموقف دلوقتي ان صحيح أمريكا بتعمل اللي هي عاوزاه في العالم كله لكن برده متوصلش لكده يعني..... يعني برده يا ست أمريكا فلتت منك المرة دي..... انتى بتكرهي ايران مقلناش حاجة..... مش طايقاها و بتقلبي كل الناس عليها دلوقتي برده ساكتين..... لكن موضوع المنظمة الارهابية دي كبيرة شوية.
اصل الحكاية هتبقى سلطة خالص كده.... و مش بعيد نصحى من النوم نلاقيهم حطوا محلات الفول و الطعمية على القايمة دي.....اصلهم من اسلحة الدمار الشامل..... هيبقى نهار مش فايت.
الموضوع ده مش لازم يتسكت عليه..... ايران نفسها مسكتتش.... ايران اصلا عارفة ان امريكا عمالة تجر في شكلها من بدري بس هي كانت حلقالها..... بس طبعا عشان أمريكا مبتسكتش و عمكو بوش كمان خلاص قرب ينطرد من البيت الابيض.... فقال لازم بقى احارب ايران و اللي يحصل يحصل.... و طبعا لأنه اتلسع من العراق فقال ينفخ في إيران....قصدي يعني أنه شاف العالم كله بيقوله ايه على العراق....حتى الامريكان نفسهم بيقولوا فين اسلحة اسلحة الدمار دي دلوقتي و بيطالبوا بمحاكمة بوش..... بس طبعا عشان هو حط ايران في دماغه فهو مش هيسبها كده بالساهل و قال ايه بقى....انا أجر في شكلهم شوية عشان اخليهم هما اللي يبدأو الحرب و ساعتها يحاربهم قال ايه بيدافع عن نفسه.... و يبقى بطل قدام الامريكان....عشان بدل مايكسروا وراه قلة يهتفوا باسمه....انما عشم ابليس في الجنة....دول مش هيكسروا وراه قلة دول هيكسروا زيييير بحاله.
بس الموضة الجديدة دي ممكن تيجي بفايدة برده..... يعني عزيزتى حواء...لو المعلم عكوة الجزار اللي تحت بيتكم بيديكي اللحمة كلها عضم زى عوايده و بيلهف في الميزان....كل اللي عليكي انك تكلمى البيت الابيض و تبلغي عنه...و هما بقى هياخدولك حقك و يحطوه على قايمة الشرف و يجمدوا ارصدته في البنوك .... و مش بعيد يضربوا المحل بالطيران كمان....
و ابقي ادعي لامريكا بقى...

بقالنا راجل................اخيراااا

اللي منكم بيتفرج على قناة المنار....ده لو لقدر الله يعني بتشوفوا حاجة تانية غير روتانا و مزيكا.....المهم اللي متابع المنار و هي بالمناسبة القناة اللي تابعة لحزب الله....هيعرف ان اليومين دول الاحتفال بذكرى حرب تموز....برده اللي مش عارف تموز ده يبقى ايه ده شهر يوليو....و حرب تموز دي الحرب اللي حزب الله ادى علقة محترمة لاسرائيل و مشاهم قفاهم يقمر عيش بعدها و ده كله كان في 34 يوم بس.... يعني لا سحر و لا شعوذة.....اسرائيل بجلالة قدرها عيطت في 34يوم بس و اشتكت لطوب الارض من اللي عامله فيها حزب الله.....اصلهم بجد بجد ادوهم علقة محترمة.... ربنا يكرمه الشيخ نصر الله بقى..... الراجل ده خلانا نحس ان فيه امل و ان لسه عندنا رجالة و هما بخير..... يعني مين كان يتوقع من البلد اللي جابتلنا اليسا و و هيفا و العالم دول كلهم ان يكون عندهم رجالة....و دي حاجة بصراحة تخللي اي حد يتفائل مرة تانية......يعني عمالين يقولوا اسرائيل و السلام و البتنجان و دول متقدمين و امريكا معاهم و منقدرش عليهم.....و في الاخر حبة شباب مش تبع الحكومة و لا حاجة يعملوا فيهم كده....و بعدين لو اتكلمنا بصراحة بقى مفيش حكومة تقدر تعمل اللي عملوا حزب الله....كانت امريكا علقتها على طول لحد ماتقول حقي برقبتي.....حكومة مين يا عم صلي على النبي.....قال حكومة قال.
صحيح لبنان برده اتبهدلت من الحرب دي و لبنانيين كتيير اوى ماتوا فيها.....بس بصوا للصورة الاكبر...احنا عندنا حد يقدر يقف قدام اسرائيل و يقولها انا اهه.... وريني بقى هتعملي ايه.....واسرائيل وقفت قدام اولمرت و طالبت التحقيق في الحرب دي و اسبابها و التحقيقات قالت ان اولمرت غلطان و الغلط راكبه من ساسه لراسه....أصله كان فاكر ان من كتر ما اسرائيل عاشرت الشعوب العربية بهتوا عليها و انه لما يشتغلهم بكلمتين و يقولهم انه هيقضي على حزب الله هما هيصدقوه و مش هيحسبوه بعدين........ بس لا طبعا دول مش زينا يا بابا و مفيش حد يعرف يشتغلهم دول هما اللي يشتغلوك...... و فعلا الاشتغالة دي مأكلتش مع الاسرائليين و طالبوا اولمرت بالاستقالة.....تخيلوا شعب يطالب كبيره بالاستقالة....جامدة دي....جامدة اوى كمان....بس يا جماعة انا مش عاوزة اتكلم في السياسة نرجع بقى لعمكو نصر الله..... الراجل ده راجل تمام......و بالرغم من ان الامم المتحدة اخدت قرار وقف النار و نزع السلاح من المليشيات و تقصد في الحوار ده حزب الله طبعا.... و قالت ان السلاح يفضل بس مع الجيش اللبناني و طبعا حكومة لبنان عمالة تقول ان حزب الله ده ولائه لسوريا و ايران و انه لازم ميخدش وضعه اوى على الساحة اللبنانية و شوية كلام كده ملوش لازمة.....بس كل الحوارات دي مخلتش الشيخ نصر الله يبيع القضية....ابدا....الراجل لسه متمسك بالقضية بتاعته و قال ان حزب الله مش هينزع سلاحه طالما فيه عدوان و خطر اسرائيلي محيط بلبنان...... يعني الراجل نفض لكلام الحكومة و حواراتها الفاشلة دي و مهمهوش كلام كل الاخوة العرب اللي قالوا ان حسن نصرالله ورط لبنان في حرب مش قادرة عليها و دمر البنية التحتية و قتل مدنيين .....اهو ده بقى حجة البليد.....عشان الناس متحاكمهمش و يقولوا طيب ليه انتوا كمان متعملوش زيهم و هما احسن مننا في ايه و ليه منرجعش الارض اللي سرقوها مننا و كل الحوارات اللي هما عارفينها فقالوا نعيش على الشعب شوية و ناكله البلوظة قال يعني فاكرين ان الناس لسه هبلة و عبيطة و متعرفش امتى بيضحك عليها.....يلا خلينا ساكتين و ربنا يهديهم
و الف الف مليون مبروك للذكرى المشرفة دي يا شيخ نصر الله و الله رفعت راسنا يا راجل.

يا اهلا يا اهلا

اهلا بيكم في المدونة المتواضعة بتاعتي... منورين و الله
مبتجوش ليه كتير... سلموا... اشربوا شاي...أي حاجة كده
ده حتى الشاي على النار

بصراحة يا جماعة مضحكش عليكم دي اول مدونة اعملها في حياتي
يعني حلوة وحشة انتوا اللي هتدبسوا فيها.... استحملونى شوية

و بعدين دي مش هتبقى اي مدونة .... دي الكافيه بتاعي....يعني المشاريب كلها عليا لو عملت اي حاجة كده و لا
كده

و في الكافيه ده هقول كل حاجة....كل حاجة نفسكوا فيها هتلاقوها....يعني مش هحرمكوا من حاجة ابدا.... هتلاقوا كلام كبيير كده..... و كلام تاني مهيس
معلش بقى أصله كافيه....لازم نهيس برده

و طبعا لان فيه ديموقراطية في البلد...أقصد في الكافيه بتاعي....فاللي مش عاجبه كلامي ميجيش تاني
هو الكافيه بتاعي و عاوزين كمان تقولوا رأيكم....ايه الفوضى دي....الديمقراطية ليها أنياب....و أنا مش عاوزاكوا تتعوروا ....أصلكم غاليين عليا أوي....و بعدين أنا كمان عاوزة مصلحتكم...أصلكم لو اعترضوا على كلامي معناه انكم هتفكروا فيه....و التفكير متعب و انا مش عاوزاكوا تتعبوا خاااااااااااااااااااااالص....أنا عاوزاكوا تستريحوا كده مع كوباية شاي على حسابي....و اللي مبيشربوش ممكن ياخد نسكافيه...أظن مفيش دلع أكتر من كده اهه