2008/05/09

الدنيا مج مجنونة نونة نونة


اول امبارح الصبح ركبت المكروباص عادي كده زي اي يوم و عادي دفعت النص جنيه الاجرة ... عادي برده زي اي يوم.... و روجت باليل عادي زي اي يوم و ركبت برده نفس المكروباص و اديت للسواق النص جنيه عادي يعني زي كل يوم...الاقيلك السواق بيقول لكل العربية الاجرة75 قرش يا حضرات...انا افتكرت ان السواق بيستقطعنا لانه هيودينا المسافة كاملة لان كل العربيات بتنادي على نص المسافة و لو مش عجبك امشيها و السواق ده بينادي على المسافة كاملة فكل الناس طبعا اتخانقت معاه راح بكل برود طلع ورقة من معرفش مين بيقول فيها ان التعريفة بتاعة السرفيس غليت...طبعا الناس لما شافت الورقة كله طلع الربع جنيه من جيبه و دفعه من سكات... انا دفعت مع الناس برده... بس قلت للسواق يعني اركب الصبح بنص جنيه و بعد الضهر بجنيه الا ربع تيجي ازاي لحقت تغلى الاجرة طب مكنتوا تغلوها من بكرة ... مينفعش الاجرة تغلى النص في اقل من نص يوم...الراجل قالي يا انسة السولار غلي نعمل ايه يعني...المهم واحنا في السكة ركبت واحدة كبيرة و كانت نازلة في اخر الشارع و هي مسافة قليلة خالص بس هي متقدرش تمشيها...المهم الست ادت للراجل ربع جنيه قالها مينفعش يا حاجة الاجرة غليت يهديك يرضيك دي نازلة قريب مفيش فايدة...قلتلوا يا عم دي لو اخدت تاكسي مش هياخد منها الخمسة و سبعين قرش دول...السواق بنفس التناحة اللي عمال يرد بيها من الصبح قال مكل حاجة غليت و انتوا ساكتين و منطقتوش جايين تتشطروا على المكروباظات...بصراحة الراجل كسف الناس و كسفني...لما فضلت انبح في زوري و اقول يا جدعان اضربوا عشان الغلا يا جماعة خليكوا رجالة و انتوا في الحلاوة خالص و اضراب مايو فشل...جايين تتكلموا ليه دلوقتي....
اضراب ابريل هو اللي زود العلاوة لتلاتين المية و انتوا زي المساطيل قمتوا فضلتوا تدعولوا تدعولوا و قلتوا بلا اضراب بلا كلام فاضي و خليتوا اضراب مايو مينجحش...كنتوا فاكرين ان الحداية بتحدف كتاكيت... و من امتى كان اليهودي بيفرق فلوس على العيال في الشارع... الموضوع ان فيه انة و انتوا بردوا متحركتوش...التلاتين في المية دول معداش عليهم اسبوع و الاسعار غليت عشانهم خمسين المية... يبقى تفتكروا انتوا زدتوا و لا اخدتوا صابونة و على قفاكوا كمان....افتكرت النكتة بتاعة الكوبري اللي يطلعوا يدفع عشرة جنيه و لما الناس اعترضوا خلوا اللي يطلع و اللي ينزل يدفع عشرين جنيه و ياخد على قفاه...و الناس اعترضت عشان اللي بيدوا بالقفا قليلين فبيخلوهم يقفوا في طابور طويل بياخرهم.... طبعا احنا مش هنشتكي زي الناس الوحشين دول لاننا و لله الحمد متوفر عندنا كتير من الناس دول و كتر خيرهم مش بيخلونا نقف في طوابير طويلة....الناس قلبها علينا فعلا يا رجالة....احنا بس اللي ناكرين الجميل...شعب ابن---- مبيقدرش نعمة ربنا عليه....
بص يا باشا انا شكلي بقيت بغلط كتير و من كام بوست كنت بشجع على الانقلاب العام و تعطيل مصالح الناس و مش بعيد كمان لو انت عاوز تمشيها قلب نظام الحكم ميضرش برده....بص يا باشا انا استاهل اللي يجرالي لاني مبقدرش النعمة و مبصنهاش و مخي فيه جذمة قديمة و مش هبطل كلام من اللي هيوديني في داهية ده.... يخليلك المدام يا رب و العيال احبسني بقى و ريحني من اللي انا فيه و بالمرة تريح البلد من امثالي...بس ياريت تحطني في زنزانة جنب بتاعة اسراء.... اصلي بصراحة مش لاقية اكل و اشرب...فبص بقى ياباشا لان انت قلبك رحيم علينا انت توديني الزنزانة بتاعة الحاجة اسراء اسراء دي و تاخد فيا ثواب... ولان الناس بالمرة مش هتعرف تصيف في راس البر السنة بعد اللي حصل فيها فانا بقترح اقتراح بسيط كده و اهو ممكن نطلع بيه بسبوبة مع بعض...انت تأجر زنزانة اسراء دي مفروش في الصيف...و اهو كل واحد ياخد عياله و مراته و يروح هناك و اهو ينوبك فيه ثواب و يلاقي اكل يرم عضمه هو و عياله و بالمرة يتفسحوا و يصيفوا....بس يا باشا لو مش عاوزني اقاسمك في القرشين دول فمتزعلش نفسك خاااااااااااالص انا متنزلالك عنهم... الله يسهولوا يا باشا...وفي الاخر كده ياريت بس اسمع سلام الدنيا مج مجنونة نونة نونة لمطرب الاجيال محمود باشا العسيلي॥
.

2008/05/01


بما ان مفيش سيرة اليومين دول غير الاضراب الاضراب و المعلم مش فاضي يكتب بصراحة اليومين دول بما انهم يومين امتحانات...قال يعني المعلم بيذاكر....بس ده المفروض يعني...فقالك بقى انه يكتب عن الاضرب التاني اللي هو بعون الله هيشارك فيه زي الاولاني.... اللي مستغربله اللي بشوفه دلوقتي من زعيق و تهليل لإضراب مايو ده.... مع اني اول ما عرفت بموضوع اضراب مايو في الاول خالص قلت لا انا مش هشارك لان الموضوع كده هيكون اعتراض على شخص و انا اضربت عشان مبدا انما الاشخاص مش هما السبب...قبل ما تطول لسانك انا عارفة ان هما جزء من السبب بس انا مش مضربة عشان فلان ماسك كرسي ايه... انا اضربت عشان الناس مش لاقيه تاكل...عشان شفت واحد شكله مش مبهدل بالعكس شكلوا محترم و لا بس لبس عادي و واقف قدام صندوق زبالة عمال يلم منه اكل...أضربت لما لاقيت واحد لابس لبس كويس جدا و يشبه لقميص كان عند بابايا ماسك مناديل باليل في عز الجو ما كان سقعة من كام يوم و بيبيعها في المترو و شكله راجل ابن ناس و راجل كبير مش حمل بهدلة....كمان اضربت لما لاقيت ولد نايم على الارض متغطي ببطانية خفيفة في عز الشتا اللي فات و المطرة بتمطر و انا كنت لابسة جاكت و بلوفر و كوفية و متكتكة من البرد و هو يادوب لابس قميص و بنطلون و حافي و نايم على الارض....اضربت لما لاقيت واحد بيركب الكلب اللي جايبه من امريكا بألوفات العربية البي ام و بيوديه يتمشى في نادى الصيد كل يوم الصبح....ده مش حقد على الكلب لا سمح الله و لا عشان بيروح النادي كل يوم و انا بزوره مرة في السنة بس تقدر تقول اني حاطة الكلب ده بالذات في دماغي....اصلي طلبت منوا يجيبلي عقد عمل و طنشني.... لكل تلك الاسباب...حلوة تلك دي...لكل الحاجات دي انا اضربت المرة اللي فاتت و هضرب ان شاء الله يوم الحد الجاي....
الغريبة بقى اني مستغربة ازاي الناس اللي كتكتت المرة اللي فاتت...و ده للي مش مذاكر من فعل كتكت يكتكت كتكوت....الناس اللي المرة اللي فاتت فضلت انها تاكل بيض بالبسطرمة مع ولادها وخلاص على كده و مفيش اضراب و الاهلي خطير و الدنيا بخير و الحياة بقى لونها بمبي وانا جنبك و انت جنبي....كله سكت و متكلمش عن الاضراب و حتى بعد متعمل الاضراب الناس فضلت تقول انهم كانوا قلة مندسة و الحياة مشيت عادي و الامن مستتب....و معتز باشا اتكلم عنه بعد كذا يوم و فضل يدافع عن البلد و لا كانه عم الوطني حفيد سعد زغلول... و امبارح الاقيهولك عمال يتكلم عن 4 مايو...طيب من امتى الشجاعة دي كلها...و الاحزاب تقلك هتشارك...مكنتوا فين المرة اللي فاتت...يعني لو كانت المرة اللي فاتت من سنة اقلك ايوة كانت الظروف ساعتها مش سامحة انما المرة اللي فاتت دي كانت اقل من شهر...اشمعنا وافقتوا دلوقتي و موافقتوش من شهر...ولا لما لاقيتوا العالم كله بقى يتكلم عن اللي حصل و البي بي سي بتقول ان الشعب له حق يثور عشان غلاء الاسعار و الناس تعاطفت معانا يبقى ندخل في الهيصة المرة دي... و لا يمكن انكوا لاقيتوا ان شكلوا كان وحش المرة اليل فاتت قمتوا قلتوا حسنوا صورتكوا المرة دي بدل ما تتفقسوا....و لا يمكن عشان سر تاني في نفسكوا لسه منعرفوش...اصل الحنية و الوطنية دي ميطلعوش فجاة... و سلملي على الوطنية و مصلحة البلد و المواطن المصري....كمان سلام للمواطن المصري...احلى سلام للمواطن المصري.... و رقصني يا جدع قبل ما يحطوا ضرايب عليه و يغلوه هو كمان

2008/04/12

بانوا بانوا بانوا على اصلكوا بانوا


قالتها الست سعاد من زمان...بانوا بانوا بانوا على
اصلكوا بانوا و الناسي يبطل نسيانه ايوة بانوا.... متخفش اوي كده انا مجتليش الهفة الفنية لسه و لا بفكر ارشح نفسي في ستار اكاديمي... مع انهم كده خسروني... بس برده عندا فيهم مش هرشح نفسي... المهم بقى...اللي جاب الاغنية دي في دماغي هو هوجة 6 ابريل..."مع الموضوع قديم...وبلاش استظراف و كلام من نوع مش بعد العيد مش عارف ايه في الكحك و كنتي نايمة فين ده كله... بس انا كنت براقب الجو و بشوف العالم ماشي ازاي... وبصراحة كمان كنت مانتخة شوية... المهم بقى يابني.... يوم 6 ابريل الواحد كان مستعد و عمال يقول لكل الناس اتكنوا في بيوتكوا و شاركوا الناس اللي مش لاقية تاكل و الحوارات دي و الاقيلك كام حاجة حصلت تخلي الكتكوت يتبرى من امه...
الحاجات اللي حصلت ينطبق عليها الجملة المشهورة بتاعة يبقى انت اكيد في مصر.... اولا...لاني كنت من محبي معتز الدمرداش فقلت اتفرج على 90 دقيقة و اشوف و اتابع الاخبار....الاقيلك ياخويا الراجل ابو مخ نملة عاملك حوار مع لاعيب كورة و الهانم اللي معاه عاملة حوار مع معرفش مين كده و لا جابوا سيرة الاضراب و لا اكن حاجة حصلت خاااااالص.... ادي واحد بان على حقيقته و ظهرت شخصيته المكتكتة - نسبة للكتكوت يعني-.... المهم البلد كانت بتولع و مش لاقيالك اي حاجة في القنوات المصرية لا حكومية طبعا و لا خاصة و اللي كنت بعرف الاخبار منها اول باول هي البي بي سي من القناة و الموقع.... ناس ذوق ذوق ذوق الصراحة و عملوا الواجب و زيادة....
المهم بقى فضلت ابحث عن السبب الجبار اللي خلى عمك معتز يكتكت كده وملاقتش غير ان الاوامر جياله من فوق انه ميتكلمش عن الموضوع لان زي ما بتوع الحكومة قالوا ان دعوة الاضراب انتشرت على الانترنت و الشعب غالبيته امي و ميعرفش عنها حاجة... فتقريبا مكنوش عاوزين حد يتكلم عن الاضراب عشان مفيش ناس كتير تعرف....الكلام ده كان ممكن اقتنع بيه لحد ماسمعت بيان وزارة الداخلية بتاع يوم 5 و هو بيحذر الناس من الانضمام للقلة القليلة المندسة اللي بتحرض على الاضراب و اللي وصفهم صفوت باشا شريف بانهم خونة.... البيان ده ساهم و لله الحمد في ان ناس كتير مكنتش عارفة عن الاضراب او بمعنى اصح مكنتش ناوية تشارك فيه انها فضلت انها تشارك غصب عنها ....يعني بيدي لا بيد عمرو لانها عرفت ان طالما الحكومة عملت بيان زي ده يبقى اليوم مش هيعدي على خير و البلد هتبقى مقلوبة.... وفعلا ناس كتير جدا خافت تنزل من بيتها اليوم ده و تقريبا مدارس القاهرة كلها مشتغلتش لان ادارات المدارس طالبت الاهالي انهم ميجيبوش ولادهم اليوم ده حرصا على سلامتهم.... وادي ناس تانية بانت على اصلها...
اللي كان بقى الطامة الكبرى في اليوم ده...اخوانا الاخوان....اللي عاملين نفسهم حماة الشعب المصري و رافعي لواء العدل و البتنجان مشركوش في الاضراب لان محدش دعاهم ليه.... طيب بلاش اغلط بقى لاني ممكن اغلط كتير.... يعني الاخوة الاخوان دول معاهم جنسية سوداني و لا ايه بالظبط.... يعني ايه محدش دعاهم ليه...هما محتاجين دعوة....امال لما كانوا بيقولوا للناس محدش يشارك في انتخابات المحليات مبعتوش دعوة لكل مواطن ليه و لاسرته ليه بقى.... و لا زي ما بيقولوا في الانتخابات سوسة و في الاضراب ممصوصة.... ادي ناس تانيين بانوا على اصلهم و كتكتوا هما كمان
وبالنسبة للاخوة الاخوان انا كنت متغاظة لدرجة اني كنت هروح انتخب بتوع الحزب الوطني عندا فيهم مش اكتر...قال دعوة قال....
المهم بقى بعد كل الناس الحلوة دي اللي بانوا على اصلهم احب اوجه تحية كبيرة اوي و سلام مربع لعمال المحلة الجدعان بس...اللي كسروا العربيات و حرقوا المدارس لا.... و اهديلهم اغنية الحياة هيبقى لونها بمبي باذن الله قريب اوي.... وانا و انت... ودقي يا مزيكا

2008/03/28

اعمل حاجة عدلة في دنيتك...و ببلاش كمان...حجتك ايه دلوقتي؟!


متنزلش من بيتك اليوم ده....خدلك اجازة و بالمرة متشتريش حاجة... خليهم يسمعوا صوتك يا عم الحاج و متقلش و النبي اصل مصالحنا هتتعطل... انت حزب وطني و لا ايه...هما طبعا اجدع ناس...بس لو كان عجبك حالك ده يا عمنا روح الشغل و بلاش تعطل مصالح الناس.... انما بقى لو خليت عندك دم و مرحتش و اتكنيت في البيت يبقى فيه امل ان اللحمة تدخل بيتكوا في يوم من ذات الايام.... مش بقلك انزل مظاهرات يا برنس.... بقلك بس زي ما انت طول عمرك سلبي خليك سلبي كمان في اليوم ده و علافهم ازاي السلبية بتاعتك دي تقدر تعرفهم قيمتك.... مش انت سلبي خلاص خليهم يشوفوا السلبية اللي على حق... بلاش تبيع اخواتك و تستندل يا باشا و تروح الشغل.... احترم نفسك و فرح عيالك بكيلو تفاح من اللي بيشوفوه في التلفزيون ده

2008/02/22



2008/02/15

عبقرية الشخصية المصرية

مع انى مش شخصية رياضية ويمكن اكون المصرية الوحيدة اللي مشفتش ولا ماتش من بطولة الامم الافريقية ومعرفتش مصر كانت بتلاعب مين في النهائي لكن انا شايفة انى طبيعية.....بس اللي مش طبيعي اللي الناس كانوا فيه.... كله بأعلام في الشوارع....كله بيدعي ان مصر تكسب...دي حتى ماما اللي ملهاش في الكورة كانت عمالة تدعي في النهائي وتقول يارب مصر تكسب يارب مصر تكسب... بس بصراحة بقى انا مش شايفة ان مصر كسبت عشان احنا فريق جامد ولا حاجة ... بدليل صفر المونديال والخصام اللي طول بينا وبين كاس العالم.... في وجهة نظري ان المنتخب مكسبش غير بدعا الخمسة وسبعين مليون .... الخمسة وسبعين مليون نسيوا الغلا والاضرابات والاعتصامات ومشاكلهم كلها ومفكروش غير في مصر اللي بتلعب في غانا.... وخللي بالك ان ده كان في الوقت اللي كان قبل البطولة بكام يوم غزة بتشحت بس الدعا لفك الحصار واحنا استخسرناه فيها....طيب تخيل معايا لو الخمسة وسبعين مليون دول دعوا لغزة....مش هقول نوديلهم مساعدات وان كان ده المفروض بس ما علينا.... لو كنا كلنا دعينا لغزة كان زمان الحصار اتفك من زمان ويمكن كمان كنا حررنا فلسطين... ده احنا كسّبنا المنتخب مرتين ورا بعض يا جدع يبقى فلسطين هتستعصى علينا....

الغريب في الموضوع بقى ان المصريين عمرهم ما بيتجمعوا على حاجة زي ما بيتجمعوا على الكورة.... عندك ايام الملكية كانوا كارهين الملك.... قامت الثورة قالوا على عبد الناصر كاتم الحريات وديكتاتور....جه السادات قالوا عليه عميل امريكاني...و بلاش نتكلم اكتر من كده عشان نعرف نتفرج على البطولة اللي جاية.... ده حتى رغيف العيش ناس تقلك مش موجود وناس تقلك متوفر في جميع منافذ البيع....

وفي الاخر عاوزة اقول جملة واحدة.... بعد بطولة افريقيا تمن اللعيبة غلي والنوادي الاجنبية طلبت انهم يحترفوا عندها.... بس بعد موضوع غزة تمنا احنا اللي رخص.... ومبروك على الكاس.

2008/01/27

بلاش يبقى كله ضرب ضرب ياريت يبقى فيه شتيمة


طبعا بعد غيبة طويلة قررت اني اعمل بوست يكسر الدنيا عشان يبقى عود عبد الحميد...مين عبد الحميد ده...خليك يابني في حالك ودع الخلق للخالق...نرجع للي بنقوله...قررت اعمل بوست جامد ولان الموضوع اللي لاقيت كل البلوجز والجرايد والمجلات والقنوات المحترمة طبعا مش المصرية كلهم كلهم بيتكلموا عن حصار غزة...ولاني طبعا متابعة الاحداث واخر تطورات الاوضاع انا اللى بنقلها للجزيرة بنفسي...جزيرة الدهب طبعا اوعوا مخكوا يروح لبعيد....يوووه بلاش رغي بقى ونرجع للموضوع....معلش اعزروني اصلي بقالي كتير مجتش الكافيه وجوايا حاجت قد كده عاوزة افضفض بيها...المهم قلت طبعا هتكلم عن حصار غزة...بس طبعا المعلم مش بيحب التقليد.... يعني طبعا مش هتكلم واعيد وازيد في كلام معروف واتقرا في 100 جرنان وبلوج قبل كده...طيب اعمل ايه اعمل ايه....خلاص انا هتكلم عن الموضوع بس بزاوية تانية خالص.....يعني انا هتكلم عن اصل الليلة دي كلها ...بس من اولها يا جماعة انا عاوزة اتفق معاكوا زي العنوان مبيقول ياريت بلاش ضرب ممكن شتيمة....الحكاية كلها مش ان عم بلفور كان حاطط فلسطين في دماغه وعاوز يعمل اسرائيل عشان يقضي على فلسطين والحوار ده كله....الموضوع كله ان عم بلفور كان مزنوق...عادي يعني كل الناس بتتزنق....الراجل كان مزنوق في حاييم وايزمان....انجليزي ده يا مرسي....ماعلينا اسكت يا لساني شوية وادخل جوة....مش عارفة ليه حاسة اني عندي شيزوفرنيا النهاردة.....المهم ان عمك بلفور اتزنق في الحاج وايزمان ايام الحرب العالمية الاولى عشان تركيبة كيميائية هتساعد بريطانيا في الحرب...بودرة عفريت ولا حاجة....المهم ان الحاج وايزمان الهي يبشبش الطوبة اللي تحت راسه شرط على عمك بلفور انه يديله كلمة رجالة بانه يدي للجالية اليهودية بلد يعملوا فيها وطن ليهم...طبعا ده مش عشان سواد عيون عمك وايزمان ولا حتى عشان بودرة العفريت بتاعته وان كانت جزء من السبب بس عمك بلفور حب يضرب كذا عصفور بحجر واحد والعصفور التاني كان انه يخلص من الجالية اليهودية اللي كانت موجودة في الوقت ده في بريطانيا ويمكن ده كمان السبب اللي خلى باقي الدول الاوروبية متتكلمش على فلسطين لانها كانت بصراحة مصدقت تخلص من اللبش اللي كانت عاملاه الجاليات اليهودية اللي فيها فقالت تخلص منهم وتقلبهم في حتة تانية عشان تخلص من قلبة دماغهم....المهم بقى ان عمك بلفور قال لوايزمان اوكي يا باشا احنا في خدمة سعادتك وتحت امرك والبلد جاهزة وهتتسلملك دليفري لو حبيت وده طبعا في مقابل مساعدته ليه في الحرب....وبعد الحرب طبعا طلب وايزمان البلد اللي وعده بيها بلفور وبلفور متاخرش عليه...اصل عمك وايزمان ده يهودي يعني جد كوهين الكبير ومبيسيبش حقه....بلفور بقى قاله انه عنده ليه كام مكان انما يستاهلوا بقه وكان منهم على حسب ما افتكر الارجنتين واوغندا وسينا وفلسطين وكلهم متشطبين وعلى المفتاح ....وايزمان اكيد ساعتها قاله ان اوغندا هتبقى حر عليه والارجنتين قريبة من عمك بوش وهو ميضمنش الظروف يمكن يقل عقله معاه ولا حاجة وكمان سينا ضيقة شوية عليه ومفيهاش ريسيبشن واسع فقال يرشق في فلسطين....طبعا ان بحور عليكم لان وايزمان من الاول كان عاوز يرشق في فلسطين وفضل يصيع على عمك بلفور ويقوله انها البلد بتاعته اللي انطرد منها زمان وارض المعاد والبتنجان فعشان قلب بلفور الكبير قال يحقق للراجل امنيته ويدليه البلد اللي هيتشحتف عليها....المهم بقى الكلام جميل لحد دلوقتي لكن الكلام اللي هتضربوني عليه جاي ورا....بلفور مش هوا السبب وبريطانيا مش هي صاحبة الازمة اللي حاصلة دلوقتي....ايوة يا جماعة....المستشار الخاص للملكة بنفسه قال ان بلفور وعد وايزمان انه يروح هو وزمايله على فلسطين من غير ما يطردوا الفلسطينيين منها...يعني يلعبوا مع بعض ميتخانقوش...لا بجد...الخارجية البريطانية رفضت العنف اللي كانت بتعمله العصابات الصهيونية مع الفلسطينيين حتى ان كان فيه تقرير مش فاكرة اسمه دلوقتي عملته لجنة زي بتاعة تقصي الحقائق كده تبع الحكومة البريطانية ووصفت الوضع البشع اللي كان موجود في فلسطين...دول حتى باقي اليهود الاوروبيين اللي كانوا في مناصب كبيرة في بلدهم وماشيين في حالهم مش زي الجماعة اللبش اللي قلنا عليهم في الاول الناس دول كانوا رافضين اصلا وجود دولة يهودية وكانوا بيسموه تمييز ضد اليهود...تخيل؟!...كانوا بيعتبروا ان تجمعهم في بلد واحد تمييز ضدهم لانهم اصلا مواطنين في بلاد تانية فايه اللي هيشحططتهم في بلد ميعرفوش فيها حد....وده اللي خلى في يهود في بلاد اوروبية لسه موجودين لحد دلوقتي ...دول الناس المحترمة اللي رفضوا يهاجروا لبلد يطردوا منها اهلها...
على فكرة بقى انا طول عمري بقول ان اليهود مش هما المشكلة...السبب في المشكلة هي الحركة الصهيونية العالمية اللي كانت عاوزة تاخد فلسطين فحت وردم...واللي خلاني ابعبر عن حبي لليهود هي الحاجات اللي بسمعها دلوقتي....كله بيدعي على اليهود وبيقول الله يخربتهم ومش عارف ايه...عندك اسرائيل كلها تدعي عليها لكن اليهود عملولك ايه...ده الرسول (ص) بنفسه كان بيتعامل معاهم عادي وكان بيزورهم واتجوز واحدة منهم بعد اسلامها يعني الغلط مش في اليهود يا خوانا ....الغلط في الصهاينة...عاوز تدعي على الصهاينة مش مشكلة ادعي براحتك...لكن بلاش اليهود وحياة والدك....مش هما السبب في اللي بيحصل في فلسطين....وطبعا لاني عارفة انوا كله حضر السكاكين دلوقتي وبيدور على عنواني عشان يضحي بيا في العيد الكبير بس زي ما قلتلكوا بلاش كله ضرب ياريت تكتروا من الشتيمة...وعشان الخناقة تكمل بقى انا هقلكوا كلمتين واجري...جزء من سبب الازمة اللي حاصلة دلوقتي في فلسطين وهي الحكومات العربية...مش عشان قاعدة زي خيبتها لا سمح الله ومش بتحارب اسرائيل والحوارات دي...ينقطع لسان اللي يقول كده يا باشا...بس الحكومات العربية زمان ايام اعلان الدولة الصهيونية والحرب والنكسة والحوارات دي طردت اليهود اللي فيها
....اينعم...مصر والعراق واليمن وغيرهم كانوا السبب في زيادة عدد الاسرائيليين اللي بيحاربونا دلوقتي....سياسة عبد الناصر في تعذيب اليهود المصريين وتطفيشهم من مصر ساعدت بحمد الله في زيادة عدد الناس اللي بنحاربهم...بصراحة انا مشفتش غباء اكتر من كده...تطرد ناس من بلدك كانوا بيحترموك وبيقدروك وشايلينلك جميل عشان تقلبهم ضدك وتزود اعدائك واحد....يمكن يكون ليهم وجهة نظر ساعتها ومخي اللي على قدي مش قادر يلقط وجهة النظر العبقرية دي...ومحدش يقوللي اصلهم كانوا كلهم عملاء للموساد والحوارات دي...اصل بالعقل كده مينفعش تروح لطايفة بحالها في بلد وتخليهم عملاء للمخابرات اصل مش معقولة جهاز مخابرات يشغل الشعب بتاعه كله فيه...امال باقي الوزارات مين اللي هيشتغل فيها....فبلاش بقى والنبي حوار انهم كانوا جواسيس ويستحقوا الطرد ده عشان مش واكل معايا
وفي الاخر ياريب متكونوش لسه عاوزين تقيموا الحد عليا...استنوا شوية بس لما اربي العيال عشان ميتيتموش قبل ما يجوا...

2007/12/30

يخرب بيت التفاهة


سوري يا جماعة اني بداتها بشتيمة بس بصراحة الموضوع كده بقى زيادة اوى....كل شوية الاقي حد يقولي هابي نبو يير ويا ترى ناوية تعملي ايه في السنة الجديدة والحوارات اللي انتوا عارفينها دي...اخر مزهقت مبقتش ارد على الموبايل اصلا من تفاهة السؤال....قلت اقلبلك في التلفزيون لاقيتلك برنامج طويل عريض برده بيسالوا فيه الناس هما ناويين على ايه في السنة الجديدة وايه اللي هيغيروه وايه اللي هيعملوه....يا تافه يا---- ولا بلاش عشان الرقابة متحزفش حاجة... انا بقى نفسي اشوف مين الفاضي ده اللي مستني اليوم بتاع راس السنة عشان يقعد مع نفسه ويفكر ايه اللي عمله غلط وايه اللي ناوي يخططله والحوارات دي....هو احنا في فيلم عربي اول ما البطل يلاقي حبيبته اتجوزت واحد تاني وقلبته يقعد مع نفسه ويعمله كباية قهوة وطبعا مفيش مانع لو كان مربي دقنه ولابس بيجامة مقطعة وبعدين يبص للنتيجة ويكتشف ان العمر بيجري بيه وهو مش هبحصله يقوم قايم مرة واحدة داخل واخد دش وحالق دقنه وينزل على الشغل واذ فجاة يعمله مشروع ناجح وكل الممثلات اللي في الفيلم يجروا وراه ويتجوز ويجيب ولاد مقطقطين ويقابل البطلة بعد عشرين سنة وهي جوزها مطلقها ومتشردة بالعيال وتبص عليه وهو واقف مع اسرته السعيدة وتقوله سامحنى يا كمال يقوم يقلها سامحتك يا امال وتنزل كلمة النهاية على الشاشة...يا نهار افلام...اللي عاوز يعمل حاجة في حياته يعني مستني راس السنة عشان يعملها ولا اللي اصلا ناوي انه يتعلم من غلطاته مستني راس السنة عشان يتعلم فيه...ايه الهم ده يا ربي....وبعدين اصلا ايه اللي خلى اليوم ده مختلف عن باقي الايام...يعني ليلة راس السنة بيكون الواحد نايم عشان يروح تاني يوم الشغل وياكل نفس ساندويتش الطعمية اللي بياكله كل يوم ويركب نفس الاتوبيس اللي بيوديه متاخر واخر الشهر بيتخصمله برده زي اي شهر تاني...مش حاسة باي اختلاف...وبصراحة برده مش فاضية اقعد القعدة اللي قعدها البطل من شوية دي عشان اقول لنفسي فكك من امال ومستقبلك لسه قدامك و زهرة العلا برده احلى من فاتن حمامة وفي الاخر هتطلق من جوزها ويبقى انت الاحسن منها....اكيد بتقول دلوقتي هي ايه اللي حصلها وايه اللي طير البرج اللي فاضل عندها...بس صدقني اللي عمل كده كل المكالمات والرسايل بتاعة السنة الجديدة...عاوز تغير حياتك متستناش سنة جديدة ولا قديمة ولو عاوز تاخد قرار تغيير مسار برده متخليش حاجة تعطلك....اعمل اللي انت عاوزه ومش لازم بركة راس السنة تكون موجودة عشان قراراتك دي تنجح
وبعد الغم اللي غمتكوا بيه ده احب اقلكوا

HAPPY NEW YEAR

2007/12/19

نداء الى اصحاب القلوب الرحيمة


نداء الى اصحاب القلوب الرحيمة
انا طفل عندى اخ صغر لسه مولود وماما اختفت في ظروف غامضة ومن كام يوم جم ناس منعرفهمش لبابا وقالولوا تعالى عندنا هناكلك ونشربك ونعملك كل اللي انت عاوزه وهو راح معاهم وبعدين لاقيتهم بيقولولي من شوية ان بابا مات... بابا مااااااااات.... ان مش بشحت منكم حاجة... انا بس كل اللي عاوزه انكم تدورولي على اللي قتل بابي وتنتقموا منه...وانا بقى ربنا يتولاني برحمته انا واخويا الصغير.... وكل سنة و انتوا طيبين
امضاء
ابن الخروف اللي عندكوا في التلاجة



كل سنة وانتوا طيبين... بطلوا اكل لحمة كتير....طبعا ما العيد فرحة واكل لحمة واجازة وانتخة....انسوا الكلام ده خالص وراعوا شعور اخواتكم اللي نازلين الشغل من تاني يوم ومعيدوش اصلا