المعلم جاله تاج

التاج ده اول تاج يجيلي من ساعة مفتحت الكافيه ده عشان كده اكيد هيكونله معزة خاصة في قلبي
و طبعا المعلم صاحب الكافيه بيبعت سلامه لمحمد باشا صاحب مدونة بيني و بينك اللي بعتهولى و بيبعت سلامه لمحمد و الحاج و الحاجة و ابو سريع في طنطا و محمدين في الزجازيج و لاسرة البرنامج و يحب يسمع اغنية جبار لعبد الحليم حافظ

يوه الحماس خدنى و رغيت كتير ندخل بقى في الجد
---------------------------------------------------

مين اول شخص عرفت انك بتحبه, يعني انك نفسك يبقى معاك على طول، و نفسك تبقى مثله و ليه؟؟
طبعا طبعا من غير تفكير جدو...كنت بموت فيه و هو كمان كان بيحبني....كان نفسي انه يكون معايا على طول....و ساعات كتير بسرح كده و افكر و اقول لنفسي لو كان معايا دلوقتي كان زمانه بيقلى كذا و انا بقله كذا و لما دخلت الجامعة فضلت افتكر كان هيبقى عامل ازاى لما يشوفني كبرت و بقيت في الجامعة .... الله يرحمه.... كان حنين جدا جدا جدا عليا و كان بيزعق لماما لما كانت بتضربني او تزعلني اما بابا بقى مكنش يقدر يفكر كده مجرد تفكير انه يزعلنى و هو موجود
اظن انى قلت ليه بحبه عشان انا بحبه...مفيش سبب...لما تحب حد بتحبه من غير سبب


امتى اول مرة قلبك اتحرك ناحية بنت للولاد و ولد للبنات؟ يا ريت تحكي عن المرة دي شوية؟؟
مممم... ليه الفضايح دي...اول مرة يا سيدي كانت حاجة كده لعب عيال... كان عندي 18 سنة و كان فيه واحد محترم جدا و كان اكبر منى بكتيييير جدا كان بيعاملنى زي بنته بالظبط و انا و الله كنت بحترمه جامد بس ساعات كنت بقول لنفسي ان ده مستر بيرفكت او مستر رايت بالنسبة ليا و انى عاوزة لما اتجوز اتجوز حد زيه...بس كان اعجاب مش اكتر...متودونيش في داهية


امتى اول مرة تشوف اتنين بيحبوا بعض و قلت هو ده الحب بجد؟
بصراحة لسه مشفتش الناس دول ... اول مشفهم اكيد مش هخبي عليكوا


كام واحدة حبيتها في حياتك ( للولاد ), و كام واحد حبتيه في حياتك ( للبنات ), و القصد حب مش شرط بجد؟
لو تقصد اعجاب ممكن اقول اتنين


كام شخص منهم كان نفسك تكمل معاه حياتك؟
واحد بس...كان اكتر من اعجاب شوية تقدر تقول كده انبهار جامد بالشخصية دي


طيب و امتي عرفت مين حبيته بجد و مين لأ؟
لسه مفيش حد بجد اول ما يكون فيه مش هخبي اكيد


ايه مقاييس الحب الحقيقي بالنسبه ليك/ليكي؟
بص بقى يا سيدي...الحب ده لازم يكون بالقلب و العقل مع بعض يعني انا بحب واحد لازم يكون الواحد ده اصلا مناسب ليا لو مش مناسب يبقى محبهوش اصلا...و الحب الحقيقي اللي بيكون بعده جواز...مش نقضيها حب في حب و بعدين نوصل للجملة المشهورة بتاعة الظروف اقوى منى يا فوزية و مقدرش اتقدملك دلوقتي و انا متقدملى عريس يا مختار و اهلي بيغصبوا عليا و خلاص بقى ننهي قصة الحب باغنية الفنان المتالق دائما حمادة هلال دايما دموع
يعني الحب الحقيقي ان حد يكون بيحب حد عشان شايف فيه انه شريك حياة مناسب و ناوى يرتبط بيه مش عشان الولد امور و البنت حلوة يبقى نقضي يومين حلوين نقول فيهم بقين حلوين برده من عينة شايفة القمر يا ليلي



هل الحب بيدوم علي طول؟
لو كان مبني على العقل مش القلب بس اكيد هيدوم...مش قصدي العقل يعني الماديات اقصد يعني الاتنين متوافقين مع بعض على المستوى الثقافي الاجتماعي كده يعني ...اكيد حتى لو المشاعر راحت او قلت في يوم من الايام هيفضل الاحترام المتبادل و هتكون فيه لغة حوار مشتركة بينهم مش هيبقى كل اللي بيقولوه هتاكل بامية بكرة و لا سبانخ


في نظرك, يعني ايه اتنين بيحبوا بعض بس مش بجد؟
يعني ناس مقضياها كلمتين حلوين عشان يبقى فيه كلام يقولوه لصحابهم و هما بيجيبوا في سيرة الناس...بيحبوا بعض بس دلوقتي مش بيفكروا انهم هيرتبطوا بس يفضلوا مقضينها حب و خلاص


للمتزوجين فقط؟انت لسة بتحب مراتك؟ طيب فاكر واحدة من اللي قبلها ولا خلاص؟
للمتزوجين بس...انا بلاش يعني...طيب انتوا اللي خاسرانين


ايه مفهوم الغيرة عندك؟
انك تكون بتحب حد و عاوزه يحبك و ميحبش حد تاني...عشان كده لما بتشوفه مهتم بحد غيرك بتضايق
مش انانية بس بتكون محتاج تحس انك اهم من باقي الناس
و انك مختلف عنهم


ايه مواصفقات البنت/الولد(للبنات) اللي انت نفسك تكمل حياتك معاها؟
تصدق سألت نفسي السؤال ده كتير...المشكلة انى كل ما اعرف حد... متفهمش غلط اقصد صحاب عاديين كده يعني الاقي في كل حد حاجة بتعجبني...شفت برده هتفهم غلط...اقصد يعني في حد جدع حد ناجح حد متدين كده يعني...من كل بستان زهرة....و انا عارفة ان مفيش حد كامل بس ليا كده شوية طلبات...هاتوا ورقة و قلم يلا عشان هقول المقادير
طبعا طبعا متدين و يعرف ربنا...مش بدقن و جلابية لا طبعا...حد معتدل يعني بيعمل فروض ربنا و عارف الحلال و الحرام عشان يتقي ربنا فيا....
و حاجة تانية مهمة انه يكون ناجح جدا في شغله...دي بقى انا قابلة التطرف فيها ....يعني موافقة على بيل جيتس...لازم يكون حد ذكي و ناجح و بيحب شغله و شغله مهم اوى في حياته و انا قابلة انه يكون ضرتي ملكوش دعوة.....
و طبعا لازم يكون راجل...البنات فاهماني اقصد ايه...فيه ولاد تحسهم كده عيال او زى اختك الصغيرة ميشيلوش مسئولية...لكن انا بقى بحب الراجل الراجل...يعني اللي بيشيل مسئولية و يعتمد عليه عشان الواحدة تحس انها ست و بس مش ست و راجل مع بعض...مع انى من انصار المرأة لكن انا بحب ان الراجل يكون راجل يعني جدع...فاهمنى طبعا...
كمان بحب الراجل الهادي المؤدب اللي يتكسف...و محدش يقولى ازاى عاوزة راجل و ازاى يبقى بيتكسف عشان الرجولة و تحمل المسئولية مش مرتبطة بالادب خالص...فين ناس كتير مؤدبة جدا و رجالة في نفس الوقت
و لو كنا بنتكلم عن الشكل...فانا مبحبش خااالص الطويل عريض المنكبين مفتول العضلات...انت بتقول هتكمل معاه حياتك مش عاوز ينهي حياتك... الناس القصيرة القليلة دي بتكون كيوت جدا و زي العسل و انا بحبهم خالص.... اما بقى الاخ توتو عضلات ده ينفع لو عاوزة واحد في خناقة مش جواز
بس كده اعتقد ان اي حاجة تانية مش فارقة معايا


و هل لاقيت ده موجود في البنت اللي بتحبها حاليا؟
أو هل لاقيت ده موجود عامه؟
مقلنا مفيش حد دلوقتي موجود حاليا...بس لو بتقول عامة ايوة موجود


هل الحب حرام؟, قصدي الحب يعني بنت أو ولد بتحبه و هو بيحبك و علي اتصال و علم بالحب اللي بينكم
مين الحمار اللي قال كده....الحب عمره ما كان حرام...بس حب عن حب يفرق...يعني فيه حب و فيه استعباط...الاستعباط هو اللى اكيد اللي حرام...يعني نقضيها تليفونات و اغاني تامر و مش عارف ايه ده طبعا حرام....لكن الحب اللى بيتهي بالنهاية السعيدة و البطل يتجوز البطلة و يعيشوا في تبات و نبات و يجيبوا صبيان و بنات طبعا مش حرام....بس شغل الاستعباط و ان كل واحد يعيش على التاني و يعيش على نفسه و يقول للناس انه في احلى قصة حب في حياته ده بقى الاستعباط اللى مش بحبه


صف نفسك كمحب في كلمه او جمله صغيرة
طبعا طبعا هتلاقي كل الناس يقولولك مخلص صادق مش عارف ايه ناقصهم بس يقدس الحياة الزوجية و يشارك في الاثاث عشان يكمل الاعلان...بس انا بقى مجربتش اصلا انى اكون محبة زي ما قولت لسعادتك... بس واثقة انى حتى لو بقيت كده مش هعرف اوصف نفسي لان مفيش حد في الدنيا كلها يقدر يوصف نفسه بصراحة و الا هيكون اكبر كداب...الناس هي اللي تعرف توصفه مش هو
---------------------------------------

ربنا يسامحك يا محمد على التاج ده...و لو اي حد شايف ان التاج ده النقطة الفاصلة في تاريخ الكافيه و انكوا هتلاقوا بعديه شعر و كلام من عينة الحب الحب و الشوق الشوق انسوا خالص...احنا هنرجع للجد... التاج ده كان حاجة تفاريح كده عشان نفرح بيها محمد باشا اللي هدانى بيه و المعلم طبعا صاحب واجب و مش بيرد هدية ابدا

و يا ريت اي زبون من زباين الكافيه يتفضل ياخد التاج ده عربون محبة مني ليه
مش عارفة هتودوا جمايلي دي فين شاي و قهوة و تاج ببلاش
يلا اهو كله بثوابه

تهييسة جامدة اوى من المعلم

من الاول اهو يا خوانا بقلكم ان دي تهييسة...حاجة كده تقروها و تبلوها و تشربوا ميتها....الاستاذ اخويا عقبالكم كده و عقبال ولادكم زبون جديد في الجامعة....لسه الباشا في اول سنة ليه السنة دي في الحياة الجامعية بعد كتمة الثانوية العامة...المهم اخويا ده يا عيني كتكوت خالص ...مش كتكوت اوى هو صايع برده...بس تقدر تقول انه من النوع اللي مكبر دماغه...مش عارفة بقى عشان بيسمع كلام ماما و لا هو كده خلقة المهم...الباشا كنت بعته امبارح يعمللي شوية حاجات في الكلية لقيته جاي يقوللى دي الجامعة كل بيبانها كانت مقفولة و كله بيدخل من باب واحد و بيدققوا على الكارنيهات و فيه عربيات بوليس....عربيات بوليس الاهبل....ما علينا...قلتله هو فيه ايه قالى معرفش تلاقي حد مهم جاي يزور الجامعة...بعد شوية افتكرت حوار الانتخابات اللي حصل السنة اللي فاتت...يكونش يا حبيبي امبارح كان فيه انتخابات؟... انتخابات؟؟!!و الجامعة مالها بالانتخابات... يا نهارك بمبي انتخابات الجامعة يابني....هي الجامعة فيها انتخابات....كنت عاوزة اقله ينيلك بس كانت مامى حبيبتي على مقربة مني فقلت احترم نفسي و مهزقش ابنها ...اصله ننوس عين مامته...قلتله انت مش حاسس ان فيه جو انتخابات عندكوا و لا ايه....و لا اعرف...تكونش بتزوغ زي عوايدك اصله ايام ثانوي كنا بنعرف لما نلاقي جواب من المدرسة مشرف على البيت لكن في الجامعة مين اللي هيعرف بقى....المهم الولد حلفلي انه مش بيزوغ بس ميعرفش حكاية الانتخابات دي .... اصله من اول يوم راح فيه الجامعة الواد رجع مخضوض و وشه ملون ماما بتقله مالك يا حبيبي قالها تخيلي الاخوان دخلولنا المدرج النهاردة و قعدوا يتكلموا معانا...و كان بيقلها كانه بيقول اسامة بن لادن ادانا محاضرة النهاردة...ماما بقى اول ما سمعت كده...يا خبر بص يا حبيبي احنا مالناش دعوة بالناس دول خلينا في حالنا انت ابن ناس و احنا مش بتوع بهدلة بعد كده لما يتكلموا ملكش دعوة بيهم...انا قلتلها ازاى يا ماما هو انتى و الحكومة عليهم ما هما ولاد ناس برده و كمان ناس محترمة ...مامتى حبيبتي جهزت الطيارات و حملتها بالقنابل العنقودية و اطلقتها عليا...هما احرار في نفسهم يعملوا اللي هما عاوزينه متسمعش كلام اختك دي اللي هتوديك في داهية.... هما اساسا هياخدوا بنك على ايه دول عاوزين رجالة مش عيال ولاد مامتهم...عيال عيال عاجبني كده متضيعيش الولد انا معنديش غيره و انت ملكش دعوة باختك انا بقلك اهو و على الله اسمعك بتجيب في سيرة السياسة دي تاني الجامعة يا حبيبي للمحاضرات بس و انت تركز في كليتك عشان تجيب تقدير...و الواد زي الاهبل قال حاضر يا ماما انا اصلا مش عاجبني العيال دول....مامتي كانت ساعتها توجهت للمطبخ اللي هو في اخر الشقة و انا انتهزت الفرصة السانحة قدامي و قلت اثقف الواد و اخد فيه ثواب و لسه بقله يا حبيبي الناس دول هما و باقي بتوع المعارضة مظلومين في حوار الانتخابات دول بيشطبوا اساميهم حتى من القوايم يعني لو تزوير كنا نقول ماشي لكن دي حصلت للشطب كمان و ده تصرف غير متحضر بالمرة...و هما بيشطبوا اساميهم ليه مش عشان ميخلهمش يأثروا على باقي الطلبة و هما سياستهم مش كويسة.... يا سلام يا ناصح يا بتاع السياسة.... هي ماما سمعت سياسة من هنا و لا قيتها بتقول مش قلتلك ملكيش دعوة باخوكي انتى عاوزة تضيعيه...و كانت لسه في المطبخ اللي هو في اخر الشقة و كان سمعها ستة على ستة...مش زي لما اقلها يا ماما مبكلش الكوسة الاقيها حالقالي و لما اقلها كذا مرة الاقيها بتقول بكل براءة انا في المطبخ يا حبيبتي و مش سامعاكي كويس....لكن في السياسة سمعتها على طول...المهم سكت و قلت الم تعابيني عشان انا مش قد مامي لما تعلن الحرب و اعلنت الانسحاب طوالي ...
و برغم تفاهة اخويا الا اني فكرت في كلامه... اذا كانت الحكومة مبهدلة بتوع المعارضة عشان شايفة ان سياستهم مش كويسة و ميأثروش على الناس طيب متسيب الناس هي اللي تقرر...مش تقرر تنضم لبتوع المعارضة او تقول عليهم كويسين او وحشين لا سمح الله...قصدي يعني هما وحشين طيب سيبوا الناس يقولوا عليهم وحشين و مينتخبهمش...ليه الشطب...مش بس بتكلم على انتخابات الطلبة بتكلم على باقي الانتخابات اللي بيتشطب فيها بتوع المعارضة زي النقابات و مجلس الشورى و غيره...اصل موسم الشطب قرب يهل علينا و بدأ بالطلبة...انا بقى ليا سياسة مختلفة خالص....انا طبعا شايفة زي ما الحاجة الحكومة بتقول ان الناس دول وحشة و مش بيسمعوا الكلام و مبيغسلوش رجليهم كمان قبل ما يناموا...اشطة كده يا باشا؟؟....طيب ما بلاش نشطبهم...اصلهم بيعملوا دوشة و يعيطوا و الناس بتتعاطف كمان معاهم يعني حاجة مش في مصلحتنا خالص...يبقى الحل ايه....احنا نسيبهم ينزلوا الانتخابات و الناس من نفسها مش هتنتخبهم بما انهم وحشين و الناس زي اخويا كده ناصحة و واعية و عارفة انهم مش ولا بد...ساعتها بقى هيتكسفوا من نفسهم و مش هيرشحوا نفسهم تاني...بس اتحلت اهى من غير بلطجة و لا ضرب و لا وجع قلب...و لو حصل و العياذ بالله ان الناس دي حد انتخبها نبقى نجيب الصناديق بتاعة 99.9% و خلاص... يا دار مدخلك شر...هما انبسطوا عشان دخلوا الانتخابات و احنا انبسطنا و عملنا اللي احنا عاوزينه و كل الناس تبقى مبسوطة و دماغها عالية.... و اديني احلى سلام مربع لشبابنا اللي زي الورد اللي من عينة اخويا اللي هيرفعوا راية المستقبل... و انا و انت و دقي يا مزيكا...

مشربتش من سينها؟؟

كنت قاعدة كده في ساعة صفا و بشرب كباية النعناع في البلكونة و اخويا مشغل قناة الاخبار اللي فجأة قلبت على ميلودي و عمالة تذيع مشربتش من نيلها جربت تغنلها و لما تروح تصلي العصر يبقى انت اكيد في مصر و كل الاعاني بتاعتنا الحلوة دي.....و اذ فجأة التليفون رن...طبعا طبعا انا كنت ساعتها في مود الوطنية و لو لقيت حد يقولي مصر عاوزاكي هروح البي الندا طوالي.....المهم عشان مطولش عليك التليفون لما رن و رديت لاقيتلك واحد حبيبي حبيبي حبيبي بحبه كده لله في لله المهم عصرت على نفسي لمونة و رديت ايوة ازيك عامل ايه؟....زفت...ليه يابني كده.....عاجبك اللي بيحصل ده؟...ايه اللي بيحصل....هقلك ايه و لا ايه هلاقيها من قرف الشغل و لا المرتب اللي مش بيكفيني لاخر الشهر و لسه باخد مصروفي من بابايا و المواصلات و البلد و....عندك مالها البلد بقى "متنسوش انى في مود الوطنية"....حالها زفت و الواحد مخنوق انا بفكر انى احضر ورقي و اسافر بره زي ماقلتلك....تسافر بره؟؟؟انت اتجننت يابني و لا ايه تسافر بره ليه البلد دي احسن من غيرها و بعدين ايه اللي يضمنلك ان جوة مش احسن من بره؟؟؟استهدى بالله كده....جوة احسن من برة و انا اللي بقول عليكي مثقفة و متنورة انتي مشفتيش اللي حصل في فرنسا؟...ايه يا سيدي اللي حصل في فرنسا؟....بتوع النقل عملوا اضراب....يا راجل؟؟....اه و الله عشان مرتباتهم ضعيفة و الريس بتاعهم عاوز يخصخص شركات النقل قاموا احتجوا و عملوا اضراب و البلد كلها كانت واقفة و الناس قعدوا في بيوتهم و الطيران اتعطل و هما داخلين على موسم كاس العالم في معرفش ايه كده يعني حاجة مهمة....طيب و انا مالي من الليلة دي كلها.....ايه؟؟...اقصد يعني انت مالك باللي بيحصل ماللي يضرب يضرب متشلش في نفسك ياخويا كده مخك يضرب....انتى بتقوللي ايه؟....مبقلش مبقلش متشغلش دماغك بيا انت عاوز ايه دلوقتي عشان كباية النعناع قربت تخلص و مش ناقصاك احم احم اقصد يعني مالهم بتوع فرنسا دول.... يوم بحاله وقفوا البلد و مكنش فيه لا مترو و لا اتوبيس و لا قطر و بقلك الطيارات اتعطلت و حالة البلد بقت كرب....ياعيني طب معندهمش كام توك توك كده يتصرفوا بيهم.....توك توك ايه انتى اتهبلتي بقلك اضراب تقوليلي توك توك بقلك ايه سلام بقى لحسن شكلك كده مهيس النهاردة....الحمد لله يووووه قصدي يعني سلام ايه انت زعلت و لا ايه يابني ده انا شايفاك مش في المود قلت افرفشك شوية قولي بقى ياسيدي انت قارش ملحة فرنسا ليه....انتي مستقلة بانهم يعملوا اضراب جماعي زي ده دول كل نقابات العمال بتوع النقل شاركوا فيه و محدش كمان اتقبض عليه تصوري.....يا راجل تلاقيهم بيقولوا كده عشان الصحافة اضراب زي ما انت بتقول كده يعدي بالساهل تلاقيهم لموا بتوع النقل دول باتوبيساتهم بمتروهاتهم بمكروباصاتهم في القسم....قسم ايه يابنتي انتى هبلة انتى فاكراهم عاملين اضراب في فرنسا القمح دي فرنسا يا ماما...مالها يعني فرنسا يا ماما هما مش عندهم ظباط برده عاوزين يشتغلوا و لا عشان فرنسا يقعدوا على القهاوي.....قهاوي مين دول ناس متحضرة يعملوا الاضراب من دول و تتحل مطالبهم هوا.....تتحل مين يا عم انت بتصدق الحوارات دي تلاقيهم هيستنوا لما المولد ينفض و يقبضوا عليهم عشان اسمه ايه ده الشغب...شغب ايه....صدقني بس انا عارفة الحركات دي يعملولك انهم دولة متقدمة و هنحل المطالب و مش عارف ايه و بعدين يكبسوا على الناس بتوع الاضراب دول من على القهوة و يقولوا عليهم بتوع شغب و يطلعوا بعد عشرة خمستاشر سنة بالكتير....قهوة ايه اللي يكبسوا عليها هو ده بقى تفكير الناس بتوع الدول المتخلفة القمعية.....بس بس قمعية مين التليفون له ودان يا عم و انت واحد كاره حياتك بس انا لسه الامل قدامي ربنا يسترها عليك و علينا بص يا باشا انت تلم هدومك و تطلع على فرنسا و تعملك اضراب هناك عشان يزودولك المرتب و يمكن ربنا ينفخ في صورتك و تطلب لجوء سياسي و لا حاجة و ابقى اتجوزلك واحدة فرنساوية و تجيب اولاد مقطقطين تعلمهم الكفاح و الكلام الكبير ده و ______الو الو انت رحت فين؟ الو......الواد انتحر يا عيني كان لسه صغير

وسع يا جدع....و سع يا عم

النهاردة تلاتة في الشهر...عارفين يعني ايه تلااااتة في الشهر
يعني كمان 3 ايام هيبقى 6 اكتوبر
و اللي مش عارف يعني ايه 6 اكتوبر اعرفه بنفسي
متخافوش كده مش هكلمكم عن الحروب و الحوارات دي
6 اكتوبر له معنى اعمق من كده بكتييييير
6 اكتوبر ده اليوم التاريخي اللي المعلم صاحب القهوة شرف فيه في الدنيا
أيووون
انا جيت
جيت من واحد و عشرين سنة بالظبط بالتمام و الكمال
يعني شفتوا بقى ايه اهمية اليوم ده
و لو بدات تستظرف و تقول و ايه يعني و هي هتقرفنا بعيد ميلادها ليه ...هقووووول لسيادتك
ده مش اي عيد ميلاد
ده الواااااااااااحد و عشرين
عارف يعني ايه الواحد و عشرين
يعني وسع يا جدع وسع يا عم بقيت محسوبة على الدولة نفراية
و بلغت سن الرشد كمان
شفتوا بقى اهمية هذا اليوم
انا طووول عمري بحب 6 اكتوبر ده و الله...ليه معزة خاصة في قلبي
مش عارفة ليه بس مبقتش احس بعيد ميلادي الا لما اتفرج على فيلم اعدام ميت و مسلسل رأفت الهجان
و الله السنة اللي فاتت لما متفرجتش على اعدام ميت كنت حاسة ان فيه حاجة ناقصة
مكنش حاجة حلوة كده و مخدتش راحتى في عيد ميلادي...كان بايخ كده و ملوش طعم
طبعا مفيش حد في الدنيا يربط عيد ميلاده باعدام ميت بس انا مش اي حد برده
حافظة الفيلم ده عن ظهر قلب و خصوصا الحتة الاخرانية اللي منصور بيروح للشيخ مساعد و يقوم واخده على خوانة و غزه بالسكينة و يقوله ليه كده يا بوي...يقوم ابوه يقوله بايدي يا ولدي اطهرك من الخيانة
ياااااااه جامدة جدا
كل ماسمع الكلمة دي افتكر عيد ميلادي على طول
المهم
مش هوصيكوا بقى
هدايا محترمة كده...انسوا حوارات الدباديب دي خالص
انا بعد عشرين عيد ميلاد اكتشفت انى معنديش هدايا عدلة غير كلوا دباديب دباديب...اصلي كنت هابلة زمان اى حد يقوللي بتحبى ايه اقله دبدوب...بس الواحد لما الحياة قرصته عرف ان الدباديب دي متفكش زنقة
يعني لو كان الناس جابوللي كام حتة دهب كان الواحد ضمن مستقبله بيهم لكن اعمل ايه بالدباديب دي
اقف ابيعهم على ناصية الشارع يعني
ما علينا
تبرعاتكم المادية ابعتوها على حساب رقم 1111 في اي بنك عربي او اجنبي...رقم الحساب موحد
اما التبرعات العينية...اقصد الهدايا يعني تكون حاجة كده قد المقام
و انا هجيبلي كام واحد من الخريجين اللي قاعدين على القهوة و اعمل خدمة هدايا دليفري
يعني اتصل بيا يوصلك شاب زي الورد لحد باب البيت ياخد الهدية
بس اعمل حسابك بقى انها متقلش عن بتاع 800 او 900 جنيه كده
انا عارفة زنقة العيد و رمضان و الحوارات الفكسانة دي بس ده عيد ميلادي الواحد و عشرين برده
و بعدين مع كل هديتين هتجيبهم هعملك على التالتة خصم 50%
شوف بقى ياعم التضحية
مطولش عليكوا بقى عشان اروح ادور على رأفت الهجان
اااه صحيح نسيت
كل سنة و انا طيبة و عقبال مليوووون سنة