٢٠٠٨/٠٥/٠١


بما ان مفيش سيرة اليومين دول غير الاضراب الاضراب و المعلم مش فاضي يكتب بصراحة اليومين دول بما انهم يومين امتحانات...قال يعني المعلم بيذاكر....بس ده المفروض يعني...فقالك بقى انه يكتب عن الاضرب التاني اللي هو بعون الله هيشارك فيه زي الاولاني.... اللي مستغربله اللي بشوفه دلوقتي من زعيق و تهليل لإضراب مايو ده.... مع اني اول ما عرفت بموضوع اضراب مايو في الاول خالص قلت لا انا مش هشارك لان الموضوع كده هيكون اعتراض على شخص و انا اضربت عشان مبدا انما الاشخاص مش هما السبب...قبل ما تطول لسانك انا عارفة ان هما جزء من السبب بس انا مش مضربة عشان فلان ماسك كرسي ايه... انا اضربت عشان الناس مش لاقيه تاكل...عشان شفت واحد شكله مش مبهدل بالعكس شكلوا محترم و لا بس لبس عادي و واقف قدام صندوق زبالة عمال يلم منه اكل...أضربت لما لاقيت واحد لابس لبس كويس جدا و يشبه لقميص كان عند بابايا ماسك مناديل باليل في عز الجو ما كان سقعة من كام يوم و بيبيعها في المترو و شكله راجل ابن ناس و راجل كبير مش حمل بهدلة....كمان اضربت لما لاقيت ولد نايم على الارض متغطي ببطانية خفيفة في عز الشتا اللي فات و المطرة بتمطر و انا كنت لابسة جاكت و بلوفر و كوفية و متكتكة من البرد و هو يادوب لابس قميص و بنطلون و حافي و نايم على الارض....اضربت لما لاقيت واحد بيركب الكلب اللي جايبه من امريكا بألوفات العربية البي ام و بيوديه يتمشى في نادى الصيد كل يوم الصبح....ده مش حقد على الكلب لا سمح الله و لا عشان بيروح النادي كل يوم و انا بزوره مرة في السنة بس تقدر تقول اني حاطة الكلب ده بالذات في دماغي....اصلي طلبت منوا يجيبلي عقد عمل و طنشني.... لكل تلك الاسباب...حلوة تلك دي...لكل الحاجات دي انا اضربت المرة اللي فاتت و هضرب ان شاء الله يوم الحد الجاي....
الغريبة بقى اني مستغربة ازاي الناس اللي كتكتت المرة اللي فاتت...و ده للي مش مذاكر من فعل كتكت يكتكت كتكوت....الناس اللي المرة اللي فاتت فضلت انها تاكل بيض بالبسطرمة مع ولادها وخلاص على كده و مفيش اضراب و الاهلي خطير و الدنيا بخير و الحياة بقى لونها بمبي وانا جنبك و انت جنبي....كله سكت و متكلمش عن الاضراب و حتى بعد متعمل الاضراب الناس فضلت تقول انهم كانوا قلة مندسة و الحياة مشيت عادي و الامن مستتب....و معتز باشا اتكلم عنه بعد كذا يوم و فضل يدافع عن البلد و لا كانه عم الوطني حفيد سعد زغلول... و امبارح الاقيهولك عمال يتكلم عن 4 مايو...طيب من امتى الشجاعة دي كلها...و الاحزاب تقلك هتشارك...مكنتوا فين المرة اللي فاتت...يعني لو كانت المرة اللي فاتت من سنة اقلك ايوة كانت الظروف ساعتها مش سامحة انما المرة اللي فاتت دي كانت اقل من شهر...اشمعنا وافقتوا دلوقتي و موافقتوش من شهر...ولا لما لاقيتوا العالم كله بقى يتكلم عن اللي حصل و البي بي سي بتقول ان الشعب له حق يثور عشان غلاء الاسعار و الناس تعاطفت معانا يبقى ندخل في الهيصة المرة دي... و لا يمكن انكوا لاقيتوا ان شكلوا كان وحش المرة اليل فاتت قمتوا قلتوا حسنوا صورتكوا المرة دي بدل ما تتفقسوا....و لا يمكن عشان سر تاني في نفسكوا لسه منعرفوش...اصل الحنية و الوطنية دي ميطلعوش فجاة... و سلملي على الوطنية و مصلحة البلد و المواطن المصري....كمان سلام للمواطن المصري...احلى سلام للمواطن المصري.... و رقصني يا جدع قبل ما يحطوا ضرايب عليه و يغلوه هو كمان

هناك ١١ تعليقًا:

la3lahakhier يقول...

السلام عليكم
بصى انا ماليش فى القصص دى مش سلبية ولا مبالاة بس افضل اكون ايجابية وبما انى لاامكل حق المظاهرات والكلام الكبير ده بحاول اكون بنى ادمة على الاقل ومش بشارك فى النهب فى الهيصة ولا فى الفرجة وبس انا مع رأى الشيخ الشعراوى رحمة الله عليه الحاكم مننا فان اصلحنا انفسنا انصلح حاله
سامحينى ان كانت اول مشاركة معاكى تكون اختلاف بس انا حبيت اكون صادقة معاكى
ولك منى كل التحية

khobayb يقول...

ربنا يعينك ويكرمك في الامتحانات

---

أحزاب المعارضة أعلنت أنها لن تشارك في إضراب مايو

والإخوان أعلنوا أنهم سيدعون إلى التزام المنزل يومها .. ولن يشاركوا في أي فعاليات أخرى من مسيرات أو خلافه .. كما لن يشارك في الإضراب الأطباء والطلاب ذوي الامتحانات وأصحاب الوظائف الحيوية

---

دمتِ بخير

فرنسا هانم يقول...

هو ميعاد الاضراب مش كويس
يعنى اضرابين فى اقل من شهر
الخوف لموضوع الاضراب ده يفقد بريقه
ماذاد عن حده انقلب الى ضده

mostafa rayan يقول...

بصي ياعزيزتي هي مصر بالنسبةللأحزاب اقصد كل الأحزاب بمافيهم الأخوان المسلمين مش اكتر من صينية فته كل واحد عايز ياكل منهااكبر قدر
هما لا يهمهم البلد ولامصلحتها ولااي شيء المهم مصلحتهم هما بس واي شيي بيحقق المصلحة دي هيعملوه واي شيء ضده لاء طبعا فماتستغربيش من اي شيء

yomna يقول...

la3lkhair

و عليكم السلام...و منورة و الكافيه كافيهك و ياريت تيجيلنا مرة تانية


و لانك زبونة جديدة اكيد مش عافرة ان المعلم بيحب ان الناس تختلف معاه...اصلي انا اكيد مش عافرة كل حاجة و اكيد مش كل اللي بقوله صح...انا صحيح المعلم بس رايي خطا يحتمل الصواب و راي غيري صواب يحتمل الخطا

yomna يقول...

خبيب اهلاااااااااااااان خبيب

ازيك يا راجل...فينك من زمان...اتفضل شاي :-)

ميرسي و ربنا يخليك و ادعيلي كده كتير ربنا يخليك

---------

اما بقى احزاب المعارضة يا باشا فهي اعلنت فعلا نها هتشارك بس اللي فاكراه منهم حزب التجمع و مش فاكرة مين تاني عشان مبقاش كدابة...لكن لو انت تقصد كل الاحزاب فطبعا اكيد في منها كتير مش هيشارك...هما دول احزاب يا راجل... دول عبارة عن كوبي و بيست من حزب واحد معروف طبعا...اما الاحزاب اللي لسه فيها الرمق فهي هتشارك و ده في حد ذاته شيء كويس

yomna يقول...

فرنسا هانم

هو صحيح اضررابين في الراس توجع بس برده الاحوال متعدلتش يبقى الناس هتعمل ايه

لخوف بقى لو الناس استنت الاحوال تتعدل و متعدلتش و فكرت تعمل اضراب بعدها بسنة...مش بيجيب همه...و عندك اضرابات عمال المحلة اللي كانوا بيعملوها على فترات شبه متباعدة...و في الاخر برده لسه اللحمة مشرفتش سفرتهم

الناس هتفضل تضرب كده لحد ما يلاقوا لقمة عيش نضيفة....و الرغيف الابيض ينفع في اليوم الاسود برده

yomna يقول...

مصطفى

بص بقى يا باشا...كلام في سرك يعني...الناس مش عاملة الاضراب ده و اللي قبله عشان مصلحة لبلد... الناس عاملاه عشان مصلحتها هي لانها مش لاقية تاكل... لو كانوا لاقيين ياكلوا و البلد نصها محتل و التاني في المعتقلات و لا كانوا هيتحركوا اصلا... صدقني انا....بس مش عيب برده ان الواحد يعمل اللي في مصلحته طالما انه بده بيحقق مصلحة كبيرة

بس ده كلام في سرك طبعا...اوعى تقولوا لحد شششششش

مواطن مصرى نايم يقول...

لا الاضراب مش حينفع
الناس لسه ما فاقتش من الاولانى
ميعاده
مش كويس
بس ربنا يسهل
ـــــــــــــــــــــــ
اما بقى للمعلم اللى بينافس قهوتى
فربنا يا رب يوفقه
و يفتح فروع تانية
نورتينى بزيارتك
سلامى ليكى
eslam

Dr.Mohammed Gohary يقول...

موني
انا زعلان منك

طب انا النت كان فاصل
وماكنتش عارف حتي اجيلك الكافية ولا اكتب مواضيع

تقومي انتي تقطعي رجليكي من عندنا ينفع كدااا؟؟؟؟؟؟؟؟؟


لا انا زعلاااااان

صالحيني بسرعة

ماليش دعوة

Dr.Mohammed Gohary يقول...

قبلنا اعذارك يا ستي

بس عايزك ترجعي تزوريني وازورك زي زمان فاكرة زمااان
اياام ما كان في حناان
متركزيش هههههههههههه اصلي بهيس

بقولك بالنوسبة للموضوع

حلو بجد

هو دا فكري
الاضراب مش عنف ولا بلطجة
الاضراب تعبير عن غضب وثورة داخلية

عجبني كلامك عن الولد اللي نايم ومتغطي بمافيش
والراجل اللي بيبيع شرابات

يااااااارب الناس تسمع

تحياتي يا معلم

عايز كانز البوست الجي بس يكون مشبر


تحياتي يا معلمي