٢٠٠٧/١٢/٣٠

يخرب بيت التفاهة


سوري يا جماعة اني بداتها بشتيمة بس بصراحة الموضوع كده بقى زيادة اوى....كل شوية الاقي حد يقولي هابي نبو يير ويا ترى ناوية تعملي ايه في السنة الجديدة والحوارات اللي انتوا عارفينها دي...اخر مزهقت مبقتش ارد على الموبايل اصلا من تفاهة السؤال....قلت اقلبلك في التلفزيون لاقيتلك برنامج طويل عريض برده بيسالوا فيه الناس هما ناويين على ايه في السنة الجديدة وايه اللي هيغيروه وايه اللي هيعملوه....يا تافه يا---- ولا بلاش عشان الرقابة متحزفش حاجة... انا بقى نفسي اشوف مين الفاضي ده اللي مستني اليوم بتاع راس السنة عشان يقعد مع نفسه ويفكر ايه اللي عمله غلط وايه اللي ناوي يخططله والحوارات دي....هو احنا في فيلم عربي اول ما البطل يلاقي حبيبته اتجوزت واحد تاني وقلبته يقعد مع نفسه ويعمله كباية قهوة وطبعا مفيش مانع لو كان مربي دقنه ولابس بيجامة مقطعة وبعدين يبص للنتيجة ويكتشف ان العمر بيجري بيه وهو مش هبحصله يقوم قايم مرة واحدة داخل واخد دش وحالق دقنه وينزل على الشغل واذ فجاة يعمله مشروع ناجح وكل الممثلات اللي في الفيلم يجروا وراه ويتجوز ويجيب ولاد مقطقطين ويقابل البطلة بعد عشرين سنة وهي جوزها مطلقها ومتشردة بالعيال وتبص عليه وهو واقف مع اسرته السعيدة وتقوله سامحنى يا كمال يقوم يقلها سامحتك يا امال وتنزل كلمة النهاية على الشاشة...يا نهار افلام...اللي عاوز يعمل حاجة في حياته يعني مستني راس السنة عشان يعملها ولا اللي اصلا ناوي انه يتعلم من غلطاته مستني راس السنة عشان يتعلم فيه...ايه الهم ده يا ربي....وبعدين اصلا ايه اللي خلى اليوم ده مختلف عن باقي الايام...يعني ليلة راس السنة بيكون الواحد نايم عشان يروح تاني يوم الشغل وياكل نفس ساندويتش الطعمية اللي بياكله كل يوم ويركب نفس الاتوبيس اللي بيوديه متاخر واخر الشهر بيتخصمله برده زي اي شهر تاني...مش حاسة باي اختلاف...وبصراحة برده مش فاضية اقعد القعدة اللي قعدها البطل من شوية دي عشان اقول لنفسي فكك من امال ومستقبلك لسه قدامك و زهرة العلا برده احلى من فاتن حمامة وفي الاخر هتطلق من جوزها ويبقى انت الاحسن منها....اكيد بتقول دلوقتي هي ايه اللي حصلها وايه اللي طير البرج اللي فاضل عندها...بس صدقني اللي عمل كده كل المكالمات والرسايل بتاعة السنة الجديدة...عاوز تغير حياتك متستناش سنة جديدة ولا قديمة ولو عاوز تاخد قرار تغيير مسار برده متخليش حاجة تعطلك....اعمل اللي انت عاوزه ومش لازم بركة راس السنة تكون موجودة عشان قراراتك دي تنجح
وبعد الغم اللي غمتكوا بيه ده احب اقلكوا

HAPPY NEW YEAR

هناك ١٢ تعليقًا:

غير معرف يقول...

سمع هسسسسسسسسسسسسسسسس ..
أنا أول واحد أعلق يا جدعان ..
عدي الجمايل يا ست يمنى .. أي خدمة
-------------------------------
مبدئيا إيه الكآبة اللى انت داخلة بيها علينا دي يا بنتى وبعدين فيها إيه لما الناس تفك نفهسا من الروتين اليومي والأيام كلها بقت شبه بعضها فلما بييجي راس السنة دي الناس بتفك شوية وعايزة تحس بتغيير .. لأنهم خلاص وصلوا لكعب رجل السنة اللى قبلها واطحنوا فيها فبيستقبلوا الراس الجديدة كده ..
ومحدش طلب منك تطولي دقنك ولا تلبسي بجامة مقطعة .. والمصيبة كمان إنك بتقولى هتستحمي هو إيه اللى بيحصل عشان دا كله .. يا نهار مش فايت قال تستحمى قال ..
هو إيه اللى بيجرى فى الدنيا دي ..
وبعدين مين اللى قالك إن زهرة العلا أحسن من فاتن حمامة .. وإيه جو الأفلام القديمة اللى انتى عيشاه ده ..
---------------------------
يا يمنى يا بنتى اسمعى نصيحة من جدو فنكووش يمكن تستفيدي منها ..
لما تلاقي الناس بتهيس وجابت جازولين ولقت قدامها حاجة فرحانة بيها سيبيهم والنبى فرحانين عشان الحكاية مش ناقصة غم .. مش حتبقى انتى والزمن عليهم ..
--------------------------
وكما يقول الشاعر اللى هو أنا :
إذا ضاقت بك الأيام واستعصت ..
حاول تروش وتفك نفسك ومتخنقنيش
وبس
-----------------------------
فى النهاية عايز أقولك happy new year
ممكن سؤال أخير

















انتي ناوية تعملى إيه فى السنة الجديدة ؟
هههههههههههههههههههه

غير معرف يقول...

ينفع كدا نسيتينى أبارك للشباب الحلوين دول وانتى كمان
كل سنة وانتى راس يا عمي ( قصدى يا يمنى ) ..
وكل راس وانتوا طيبين يا جدعان

شهيدة يقول...

سلام عليكم يا يمنى
ازيك؟
كل سنة وانت طيبة على كل الأعياد اللي مرت علينا

انا عارفة اني غبت غيبة طويلة بس اعمل ايه خدت اجازة من التدوين

على اي حال انا هنا مرة تانية
بالنسبة لموضوعك هو بالضبط اللي بفكر فيه... ليلة راس السنة بالنسبة لي هي زي اي ليلة عادية... اللهم الا انها بتاخدنا لسنة جديدة وسنة بتروح من عمرنا يمكن ما قدرناش نستفيد منها
ومش ضروري الواحد يستنى الليلة دي عشان يحاسب نفسو

ده غير القرف اللي بيحصل في الليلة دي وقت "الاحتفالات" يمكن في ناس فاكرة ان الحساب بيوقف في الليلة دي

ما علينا المهم اننا نمشي صح

تحياتي ليكي
وعلى فكرة المدونة باللون ده احلى على الاقل ما فيش اسود كتير

سلام

فرنسا هانم يقول...

صحيح يا بنتى عندك حق تزعلى
وكل سنه وانتى طيبه
وهابى نيو يير

أمير القلوب يقول...

كل عام وانت بخير بس بمناسبة العام الهجري الجديد
وبجد ده عيدنا ودي السنة بتاعتنا مش الكريسماس
بارك الله فيكي
والمدونة رائعة وإن شاء الله نتواصل دائماً
تقبلي تحياتي

khobayb يقول...

كلامك صحيح وفي الجون تماما

ايه الفرق بين النيو يير والاولد يير ؟؟!!

ღϠ₡ღأمير الهدوءღϠ₡ღ يقول...

يخرب بيت التفاهه
هههههههههههههههه

والله بوست جاااااااااامد

بجد انا معاكي إن الناس كتير منهم دماغهم بقت فااااااااااضيه

مفهاش أي حاجه

واللي فالحين فيه يلبسوا ترتور ويجروا ويقولوا هابي نيو يير

ههههههههههههههههه
ههههههههههههههههههه

كل سنه و انتي بخير
وموضوع عجبني بجد

وhappy new year
وعام هجري سعيد 1429

:)
سعيد جدا بزيارتك

وسلاااااااااااااااام

kafrawy يقول...

هههههههههههههههه

يخرب بيت اللى يزعلك

عامة

انا ناوى انى مش ناوى اعمل حاجة السنة دى

Che Ahmad يقول...

ايه الغيبة الطويلة دي
ايه يا معلم هنفضل قاعدين لوحدنا كتير ولا ايه
خلصنا امتحانات جينا ع القهوة لقينا مفيهاش معلم انت روحت فين يا كبير

مستني جديدك

تشي

شريف طلال يقول...

المهم بقى بعد كل ده مقولتلناش أستفدتى ايه من السنه الى فاتت؟ و ايه الجديد الى عايزه تعمليه السنادى؟؟
ما علينا أنا اسف
المهم .. عندك حق قال يعنى اول ما الساعه تدق 12 هقعد افكر ناوى اعمل ايه و بتاع
ألى ناوى يتغير يتغير فى اى وقت من السنه
و كل سنه و انتى طيبه
و موضوع جامد جداً كالعاده
تحيااااتى

Gihad N. Sohsah يقول...

تفاهة ايه بس...دة الناس من غلبها بتدور على بصيص نور على حاجة تديها الأمل ان في حاجات كتير جديدة ممكن تحصل....وااااااااااو..ايه دة...رأس السنة...مين اللي بيحكمنا...زي السنة اللي قبليها واللي قبليها,واللي واللي واللي قبليها.....يوووووووووووووووه..يادي الهباب والطين...أما أدخل بقى احبس نفسي في الأوضة واستخبالي كام سنة...لحد ما الحال يتغير

قليل من التفكير يقول...

اللي معاه رصيد محيره

يبعت مسيجات ويطيره