شفتوا اللي حصل؟؟

رئيس الوزراء التركي رجب اردوغان عمل حوار مع الفاينانشال تايمز و ده جرنان بريطاني...هو عادي ان رئيس وزراء يعمل حوار مع جرنان...طبيعي جدا...بس اللي قاله الراجل للجرنان هو اللي خللا كل الجرايد تتكلم عنه.....الرجل قال انه عاوز يمنع القانون اللي بيمنع الحجاب في الجامعات .....و لان طبعا تركيا بلد علماني فقرار زي ده مش حاجة سهلة ممكن اي رئيس وزارة يعملها كل يوم....دي حاجة مقومة عليه مؤسسات كبيرة في البلد و منها الجيش...و لما تركيا اخدت قرار حظر الحجاب في الجامعة من سنتين كانت الدنيا كلها بتهللها و كانت ساعتها حكاية حظر الحجاب دي اخر صيحة في عالم موضة الدول المتحضرة....انا اعرف ان الواحدة تغير لون شعرها او تبطل تلبس احمر عشان الموضة لكن انها تمنع الحجاب دي ...اهي شوية دول بتدلع...يلا...المهم ان الرئيس جول بذات نفسه هو كمان بيؤيد البقين الحلوين اللي لسه قايلهم عمك اردوغان و بيقول ان الست المحجبة لما تكمل تعليم عالي احسن من الجاهلة اللي قاعدة في البيت....برده عنده حق.
اصل لما طلع القانون المنيل ده بتاع منع الحجاب طبعا فيه بنات كتير جدا فضلوا انهم ميكملوش تعليمهم على انهم يخلعوا الحجاب و هذا أدى _حلوة هذا أدى دي_ انهم قعدوا في البيت زي خيبتها عشان الدولة كانت بتدلع و عاوزة تمشي على الموضة.
انا طبعا ضد قرار منع الحجاب ده...مش لاني محجبة متعصبة...لا خالص..بس انا شايفة ان الحجاب مش بيتعارض ابدا مع علمانية الدولة...قوللي ازاى.
العلمانية اصلا ماشية بمبدأ فصل الدين عن السياسة و بتنادي بالدولة المدنية و كل الكلام الكبير ده اللي عارفينه...كمان العلمانية بتقول انها بتبعد الدين عن السياسة لكن من غير ما تشكك في الدين ده بالحلو او الوحش...يعني من الاخر يا بن الناس العلمانية ملهاش علاقة بالدين و مش معنى انك علماني انك تبقى ملحد...جميل؟؟...و في الدولة المدنية بتكون الحرية الشخصية دي واجب اساسي يجب الحفاظ عليه....يعني لما تركيا اخدت قرار منع الحجاب كانت محكمة حقوق الانسان بتاعة الاتحاد الاوروبي بتشجعها...و حقوق الانسان لما تشجع خطوة علمانية معناها ان العلمانية بتدعم حقوق الانسان...و من ضمن حقوق الانسان حرية الاعتقاد و التفكير ....طيب جميل....يعني كده تبقى العلمانية بتدعم حرية الاعتقاد طالما ملهاش علاقة بالسياسة.
يبقى ليه بقى قرار منع الحجاب...اصلا ده قرار غلط...الحجاب ده من اساسيات الدين...و كل واحدة لازم يكون لها الحرية في ظل العلمانية....يبقى المفروض ان الحجاب و خصوصا في الجامعة ده حرية شخصية...اي بنت عاوزة تكون محجبة هي حرة...و بعدين ادينا شفنا قرار المنع ده اتسبب في ايه...بنات مراحتش الجامعة و لا كملت تعليمها بسببه...تبقى هي دي الدولة المدنية اللي بندور عليها...و بعدين بما ان المرأة نص المجتمع و الكلام الكبير ده اللي بنسمعه يبقى ازاى نرضي ان نص المجتمع يبقى جاهل.
انا عن نفسي معنديش حاجة ضد العلمانية بالعكس انا شايفاها مش وحشة...بس تطبيقها بيكون فيه شذوذ و ده اللي مش حباه....يعني مش الحجاب ده اللي هيقول على دولة متطرفة او دولة دينية...لانه حرية شخصية...اي واحدة لها مطلق الحرية انها تلبسه او متلبسوش... طالما الدولة مش بتفرضه على البنات يبقى مفيش منه ضرر على علمانية الدولة...مش كده و لا ايه؟!!

عقبال مينفذوا القرار ده يا رب...و اهو نتعلم منه اننا مش لازم نكفر بربنا عشان نبقى ناس سبور و الدول اياها ترضى عننا..