النهاردة تلاتة في الشهر...عارفين يعني ايه تلااااتة في الشهر
يعني كمان 3 ايام هيبقى 6 اكتوبر
و اللي مش عارف يعني ايه 6 اكتوبر اعرفه بنفسي
متخافوش كده مش هكلمكم عن الحروب و الحوارات دي
6 اكتوبر له معنى اعمق من كده بكتييييير
6 اكتوبر ده اليوم التاريخي اللي المعلم صاحب القهوة شرف فيه في الدنيا
أيووون
انا جيت
جيت من واحد و عشرين سنة بالظبط بالتمام و الكمال
يعني شفتوا بقى ايه اهمية اليوم ده
و لو بدات تستظرف و تقول و ايه يعني و هي هتقرفنا بعيد ميلادها ليه ...هقووووول لسيادتك
ده مش اي عيد ميلاد
ده الواااااااااااحد و عشرين
عارف يعني ايه الواحد و عشرين
يعني وسع يا جدع وسع يا عم بقيت محسوبة على الدولة نفراية
و بلغت سن الرشد كمان
شفتوا بقى اهمية هذا اليوم
انا طووول عمري بحب 6 اكتوبر ده و الله...ليه معزة خاصة في قلبي
مش عارفة ليه بس مبقتش احس بعيد ميلادي الا لما اتفرج على فيلم اعدام ميت و مسلسل رأفت الهجان
و الله السنة اللي فاتت لما متفرجتش على اعدام ميت كنت حاسة ان فيه حاجة ناقصة
مكنش حاجة حلوة كده و مخدتش راحتى في عيد ميلادي...كان بايخ كده و ملوش طعم
طبعا مفيش حد في الدنيا يربط عيد ميلاده باعدام ميت بس انا مش اي حد برده
حافظة الفيلم ده عن ظهر قلب و خصوصا الحتة الاخرانية اللي منصور بيروح للشيخ مساعد و يقوم واخده على خوانة و غزه بالسكينة و يقوله ليه كده يا بوي...يقوم ابوه يقوله بايدي يا ولدي اطهرك من الخيانة
ياااااااه جامدة جدا
كل ماسمع الكلمة دي افتكر عيد ميلادي على طول
المهم
مش هوصيكوا بقى
هدايا محترمة كده...انسوا حوارات الدباديب دي خالص
انا بعد عشرين عيد ميلاد اكتشفت انى معنديش هدايا عدلة غير كلوا دباديب دباديب...اصلي كنت هابلة زمان اى حد يقوللي بتحبى ايه اقله دبدوب...بس الواحد لما الحياة قرصته عرف ان الدباديب دي متفكش زنقة
يعني لو كان الناس جابوللي كام حتة دهب كان الواحد ضمن مستقبله بيهم لكن اعمل ايه بالدباديب دي
اقف ابيعهم على ناصية الشارع يعني
ما علينا
تبرعاتكم المادية ابعتوها على حساب رقم 1111 في اي بنك عربي او اجنبي...رقم الحساب موحد
اما التبرعات العينية...اقصد الهدايا يعني تكون حاجة كده قد المقام
و انا هجيبلي كام واحد من الخريجين اللي قاعدين على القهوة و اعمل خدمة هدايا دليفري
يعني اتصل بيا يوصلك شاب زي الورد لحد باب البيت ياخد الهدية
بس اعمل حسابك بقى انها متقلش عن بتاع 800 او 900 جنيه كده
انا عارفة زنقة العيد و رمضان و الحوارات الفكسانة دي بس ده عيد ميلادي الواحد و عشرين برده
و بعدين مع كل هديتين هتجيبهم هعملك على التالتة خصم 50%
شوف بقى ياعم التضحية
مطولش عليكوا بقى عشان اروح ادور على رأفت الهجان
اااه صحيح نسيت
كل سنة و انا طيبة و عقبال مليوووون سنة
يعني كمان 3 ايام هيبقى 6 اكتوبر
و اللي مش عارف يعني ايه 6 اكتوبر اعرفه بنفسي
متخافوش كده مش هكلمكم عن الحروب و الحوارات دي
6 اكتوبر له معنى اعمق من كده بكتييييير
6 اكتوبر ده اليوم التاريخي اللي المعلم صاحب القهوة شرف فيه في الدنيا
أيووون
انا جيت
جيت من واحد و عشرين سنة بالظبط بالتمام و الكمال
يعني شفتوا بقى ايه اهمية اليوم ده
و لو بدات تستظرف و تقول و ايه يعني و هي هتقرفنا بعيد ميلادها ليه ...هقووووول لسيادتك
ده مش اي عيد ميلاد
ده الواااااااااااحد و عشرين
عارف يعني ايه الواحد و عشرين
يعني وسع يا جدع وسع يا عم بقيت محسوبة على الدولة نفراية
و بلغت سن الرشد كمان
شفتوا بقى اهمية هذا اليوم
انا طووول عمري بحب 6 اكتوبر ده و الله...ليه معزة خاصة في قلبي
مش عارفة ليه بس مبقتش احس بعيد ميلادي الا لما اتفرج على فيلم اعدام ميت و مسلسل رأفت الهجان
و الله السنة اللي فاتت لما متفرجتش على اعدام ميت كنت حاسة ان فيه حاجة ناقصة
مكنش حاجة حلوة كده و مخدتش راحتى في عيد ميلادي...كان بايخ كده و ملوش طعم
طبعا مفيش حد في الدنيا يربط عيد ميلاده باعدام ميت بس انا مش اي حد برده
حافظة الفيلم ده عن ظهر قلب و خصوصا الحتة الاخرانية اللي منصور بيروح للشيخ مساعد و يقوم واخده على خوانة و غزه بالسكينة و يقوله ليه كده يا بوي...يقوم ابوه يقوله بايدي يا ولدي اطهرك من الخيانة
ياااااااه جامدة جدا
كل ماسمع الكلمة دي افتكر عيد ميلادي على طول
المهم
مش هوصيكوا بقى
هدايا محترمة كده...انسوا حوارات الدباديب دي خالص
انا بعد عشرين عيد ميلاد اكتشفت انى معنديش هدايا عدلة غير كلوا دباديب دباديب...اصلي كنت هابلة زمان اى حد يقوللي بتحبى ايه اقله دبدوب...بس الواحد لما الحياة قرصته عرف ان الدباديب دي متفكش زنقة
يعني لو كان الناس جابوللي كام حتة دهب كان الواحد ضمن مستقبله بيهم لكن اعمل ايه بالدباديب دي
اقف ابيعهم على ناصية الشارع يعني
ما علينا
تبرعاتكم المادية ابعتوها على حساب رقم 1111 في اي بنك عربي او اجنبي...رقم الحساب موحد
اما التبرعات العينية...اقصد الهدايا يعني تكون حاجة كده قد المقام
و انا هجيبلي كام واحد من الخريجين اللي قاعدين على القهوة و اعمل خدمة هدايا دليفري
يعني اتصل بيا يوصلك شاب زي الورد لحد باب البيت ياخد الهدية
بس اعمل حسابك بقى انها متقلش عن بتاع 800 او 900 جنيه كده
انا عارفة زنقة العيد و رمضان و الحوارات الفكسانة دي بس ده عيد ميلادي الواحد و عشرين برده
و بعدين مع كل هديتين هتجيبهم هعملك على التالتة خصم 50%
شوف بقى ياعم التضحية
مطولش عليكوا بقى عشان اروح ادور على رأفت الهجان
اااه صحيح نسيت
كل سنة و انا طيبة و عقبال مليوووون سنة
هناك ٤٦ تعليقًا:
كويس انى اول واحدة اقولك هابي بيرث داي ياباشا ... ويارب كل سنة جاية تكون احلى من اى سنة عدت ... ويارب تحققي ولو حاجة واحدة بس من احلامك
بس موضوع الهدية ده .. تنسيه يعنى .. هو مش اقولك هابي بيرث داي وكمان ادفع فلوس :P
بهزر ياباشا انا عندى كام موني بتقعد على كافيهات :P
ربنا يوفقك يا كميلتي يارب
HaDiR
كل سنه وانتي طيبه يا موني وتسلم وايه الروح الجميله جدا دي ويلا ابعتي الشاب بتاع الدليفري عشان الهديه
و انت طيب يا جنجا
و الله يا جينجا يابني انت دونا عن بقيت اخواتك ليك معزة خاصة في قلبي
هو ده اول الاستفتاح...انت بس قللي الهدية دي في حدود كام عشان اعمل حسابي
اصل الهدية الغالية ببعتلها واحد ببدلة اما الهدية النص نص بنمشيها كاجوال
شوف انت بس و قوللي
و انتى طيبة يا هدير
ميرسي يا جميل
بس برده عاوزة هدية...ايه الحمرقة دي...الواحد و عشرين وعاوزة تضحكي عليه بهابي بيرث داي...ماانا بقاللي اسبوع عمالة اقلها لنفسي لحد مقربت خلاص على راي ماما اتلحس
خليلك الهابي بيرثداي دي ليكي و اديني الهدية استنفع بيها
:P
كل سنة حضرتك طيبة عقبال ال121 إن شاء الله وربنا يديكي الصحة والعمر الطويل وعقبالي أنا كمان بس لما أتم أصلاً العشرين الأول إن شاء الله
يلا اعزمينا بقى على حاجة بس أنا آسف نسيت أجيب معايا هدية وأنا جاي لأني مكنتش أعرف الخبر السعيد ده سامحيني بقى
شكراً سلام
آه صح نسيت أقولك
أنا بقالي والله كام يوم من ساعة م جه في بالي موضوع 6 أكتوبر ده بفكر في حد أعرفه يكون من مواليد 6 أكتوبر والله تبقى جامدة لكن مكونتش أعرف حد بس حاجة جامدة أوي الصراحة
يلا كل سنة وانتي طيبة تاني
و انت طيب يا استاذ و عقبالك انت كمان لما تتمها
اصل الواحد و عشرين دي حاجة كبيرة اوى
و بما ان حضرتك مكنتش عامل حسابك على هدية المرة دي مش مشكلة لسه قدامك لحد بكرة
ابقى هاتها...انا مبسبش حقي
اصله لو كان عيد ميلاد عادي كده كنت قولت معلش لكن زي مقلتلك ده الوااااحد و عشرين و كمان يوم 6 اكتوبر
يعني مش حرماكوا من حاجة اهو
يعم كل اكتوبر وانتي طيبه
د احنا عايزين حربين تلاتة علشان نطلع من الي احنا فيه
كل سنة وانت طيبة يا موني
وعقبال ميت سنة
قصدي مليون سنة
للأسف حكاية الدليفري مش حتنفع معاي عشان حتضطري تبعتي شباب الجامعة دول لحد لبنان عشان ياخدو الهدية مني
يللا اعتبريها وصلت بقى
وعقبال ما أوصل لسن الواحد وعشرين انا كمان
عشان ابقى محسوبة نفراية على الحكومة بردو
هههه
كل سنة وانت كيبة مرة تانية
سلااام
بعتذرلك يموني عن التعليق الاولاني اصلي علقته وانا بتكلم معاكي علي الياهوا ومكنتش لسه استمخيييت من الكلام لاكن لما قريت عرفت انه عيد ميلاد حضرتك " كل سنة وانتي طيبة " وعقبال 25 سنة وكفاية احسن بعد كده الواحدة بتخبي سنها
وموضوع الهدية ده انا احب اقولك انك تحطي ف بطنك بطيخة صيفي
ايه مستنية اني اقولك الهدية
مهي الهدية هية البطيخة الصيفي مفيش حاجة تاني
عموما انا بقرا باقي المقالات ومش هسيب واحد منهم
بس تعرفي مدونة خفيفة
ربنا يوفقك
اول ما قريت تعليقك عندى
عنيا اتملت دموع
عادى منا كل حياتى
دموع
لما اقابل ربنا هقوله احنا اتظلمنا قد ايه
بصي يا شهيدة يا بنتي طول مافيها هدية يبقى هاتيها بس و متشيليش هم حاجة ابدا
ده انا ابعتهملك القمر مش لبنان بس
انتى بس تؤمري و بعدين لبنان دي قريبة خالص
قوللي انتى بس انك عاوزة تهربي من الهدية...اعترفي
هههه
و انتى طيبة يا جميل و عقبالك انتى كمان لما تتمي 100 سنة مش 21 بس
بطيخة برده يا محمود...مكنش العشم برده
و بعدين انا مش بحب البطيخ...طيب قول شوكولاتاية و لا حاجة
و بعدين اطمن بخصوص السن ....مش انا اللي اخبيه بعد ال 25...ده هو خلاص هيستخبة من دلوقتي...امال شايفنى عالملة الفرح ده كله ليه...عشان هيبقى اخر مرة اقول فيها على سنى
بس الكلام ده بيني و بينك بقى متقلش لحد
من يوم الاربع بليل وانا عايز اكتب كومننت بس كل ما اكتب وادوس علي الزرار كان بيطلع ارور غريب كده
المهم انا متاخرتش اوي برضه علي أساس ان انهارده هو يوم 6 أكتوبر
كل سنة وانتي طيبة وعقبال مئة سنة
الحمد لله منسيتش السؤال اللي كنت عايز اسئلهولك
هوا انتي بتحبي لون الدباديب ايه عشان اعمل حسابي
:)
دباديب تاااااااااااااني
يابني انت عاوز تضرب و لا ايه؟؟
لا اعمل حسابك انا واحدة عندي 21 سنة و اعرف اضرب كويس
المهم ميرسي خالص على ذوقك و انت طيب ياسيدي و عقبالك انت كمان لما تتمهم و لو تمهتم يبقى عقبالك لما تتمهم تاني و اجيبلك دبدوب كده حلو على قدك
عقبالي ايه بس
أنا كل سنة لما عيد ميلادي بيقرب ببقي عايز الناس تعزيني مش تقوللي كل سنة وانت طيب
لان أيام الصغر والطفولة طارت وتطير وستطير ودخلت أيام الحقيقة والجد والحوارات ديه اللي هتستمر للاخر .......
يا ساتر يارب
ليه كده يابني....ايه سحابة التشاؤم اللي هتمطر كآبة دي
يابني خلليك متفائل كده
و ايه يعني لما ندخل في الجد...هو فيه احلى من الهزار لما نبقى جد
ده انا بحب عيد ميلادي بالذات عشان بيفكرني انى كبرت سنة و بقيت كبيرة كده خلاص و بقرب من الجد و الحقيقة و كل الحاجات اللي مش عاجباك دي
ابقى بس قوللي عيد ميلادك امتى و انا اعرف ازاى اغيرلك رأيك في اعياد الميلاد
اصلي بصراحة عيد الميلاد عندي مش عيد ميلاد..ده بيكون اقرب لفرح....و مش فرح ناس عاقلين...لا مجانين و هرباننين دلوقتي حالا كمان من المستشفى
ايه يا ست الكتوكوته 21 سنه ايه وبتاع ايه انا افتكرتك عاملا زيطه وزمبليطه فرحت والله قلت اكيد حاجه من اتنين مالهومش تالت.
1- البنوته اتخطفت مني واتخطبت واكان هيجيلي صدمه نفساويه لكن مطلعش صحيح وجاتلي صدمه اكبر هههههه.
2- قلت في سري شكلها عملتها وقررت تدخل المطبخ وتعمل شربه وترم عضمها بقي قبل رمضان مايخلص وبرده طلع الموضوع فشنك.
انما يطلع في الاخر الدوشه والزمبليطه ده علي عيد ميلاد سيادتك الواحـــــد والعشــــــرون يا خرشتاشي يا جدعان وكمان طلبات هدايا مع سبق الاصرار والتربص ايه ده مش شفتش كده قبل كده وقال ايه هتبعت حد من شباب الخريجين بتوه القهاوي طيب وفين شابات الخريجين بتوع الكافيهات هوا مش فيه مساواه برده. وبعدين انا مش هبعتلك الهديه لو جيه ولد يا خدها مني يبقي ادفع فلوس وكمان يجيلي ولد يخدهم ابداااااا ابداااااا لازم تكون بنوته ولسا مكمله الواحــــــد والعشــــــرون كمااااااان.
والف سلام وتحيه للبنوته صاحبه العيد ميلاد يلا محدش واخد منها حاجه.
ايه يا عم الدخلة دي
بقى عيد ميلادي الوااااااااااااحد و عشرين و مش عاوزنى اعمل زيطة و زمبليطة
و بعدين ماهو مش عيد ميلاد بس...مانا في اليوم ده اكلت كل اللي انا عاوزاه يا ناصح....و عملت شوربة و جميع انواع السلطات مع بقى شوية صواني كده على قدي
هههههه
اتزبط يعني اليوم ده
و بعدين لو على الهدية يجيلك المعلم صاحب القهوة بذات نفسه...المهم انك تجيبها بس...اصلنا بنحب نريح الزباين بتوعنا و طول مانتا معاك هدية يبقى خلاص بقى طلباتك اوامر
هات انت بس الهدية و نبقى نتفاهم بعدين في مين اللي هياخدها
دى اول مرة ليا هنا
كل سنة وانت طيبة
وعقبال 100 سنة
وكل سنة وانت طيبة مرة تانية
العيد ع الابواب
كل سنه وانتي طيبه
انتي شرفتي مدونتي وباركتي لي
ميرسي كتير
بس حقيقي أنا محسيتش بالواحد وعشرين كده... أصلي عقبال عندك منتظر العيد الثاني والعشرين أخر نوفمبر .. بقالي سنه اهه محسوب نفر ولكن لسه في الدراسه... والله أعلم هخلص امتي ...
هابي بيرث داي
هديتك بقه هتكون علي مزاجي
جمجمه حلوه كده ومعاها كام عظمه تحطيهم تخوفي بيهم الدباديب جنب جهازك:)
معلش أصلي طالب طب
كل سنه وانتي طيبه مره تانيه
شرفت يا كفراوي و يارب ماتكون اخر مرة
ابقى تعالى زورنا تاني
انت لازم تشرب الشاي بتاعك...مش هحسب زيارتك المرة دي
و كل سنة و انت طيب
و انت طيب يا محمود
بقى كده ياراجل...اخرتها جمجمة و كام عضمة...شايفني حانوتى
و انا اللي كنت هعزمك على شاي و اقلك على حساب المعلم صاحب الكافيه عشان اول مرة تشرفنا
انما يلا بقى خليني احسن منك...الشاي المرة الجاية عليا برده
ايه ده عيد ميلاد من ورايا؟؟؟
ماليش دعوه انا عايز تورته
ايه ده انتي مش فاتحه كافيه
طيب نزلي بيبسي بقي بمناسبة عيد ميلادك
وكلو علي خيساب صاخب المخل
ههههههههههههههه
كل سنه وانت طيبه وعقبال ما تبقي قرشانه كده وولاد ولاد ولادك يعملولك حفله عيد ميلاد وانتي عندك بتاع 221 سنه كده بس تعرفي هتبقي مشكلة هيجيبولك منين 221 شمعة ههههه
انا طووول عمري بحب 6 اكتوبر ده و الله...ليه معزة خاصة في قلبي
هههههه ليه معزة ليه قو قلبك نجيله مثلا ههههههه
تحياتي
هابي بيرث داي موني
يلا حالا بالا بالا هنوا ابو الفصاد ويك ويك
الحمد لله نسيت الهدية ههههههه
الجماجم والعظم ميطلعوش ألا للغاليين
وبعدين اعذريني أصل بقالي تلت سنين أهه ممسكتش لا عضم ولا جماجم ... بشوفهم في ايد العيال اللي في اولي وتانيه بس
المهم أنا جيت تاني اهه ... فين الشاي بقه؟
خليه بعد الفطار
:P
عررررررررررض مغري ما اقدرش اقاومه خالص جدا.
بس برده كلام في سرك الهدايا غاليا اليومين دول.
ممممممممممم طيب اختاري انتي الهديه واي خودمه يا ستي.
بس الخروجه عليكي انا مش هجيب هديه واحاسب علي الطلبات المشاركه حلوه برده.
وزورونا تجدوا ما يسركم.
يا د. جوهري...بما ان حضرتك دكتور تبقى اكيد عارف ان التورتة دي مضرة للصحة...دي فيها حاجات اااااااااااااد كده بتضر الصحة...خد عندك البيض اللي هو فيه انفلونزا طيور....و الللبن اليومين دول بيحطوا فيه كلور...ده غير طبعا السكر اللي مش هقولك بيعمل ايه بقى
كل ده و عاوزنى اضحي بزباين الكافيه و اجيبلهم تورتة
لا يا راجل قول كلام غير ده...متهونوش عليا برده
بس انت عارف لو كان عليا كنت جبتهالكوا مش موضوع بخل و لا حاجة...انت تؤمر...اما بقى بخصوص البيبسي فده بيعمل هشاشة عظام و بيتخن
سيبك انت مفيش احسن من المية...بتاعة الحنفية كمان اصل المعدنية بتكون ملوثة
هههههههه
مش عاوز حاجة تاني بقى
ميرسي على زيارتك....بس هي فين الهدية؟؟؟
نورت يا محمود و الله
و مقبولة منك الهدية...و انا اطول برده يجيلي جمجمة حلوة كده في عيد ميلادي...اهو حتى الواحد لما يتزنق يبقى يبيعهم للعيال بتوع سنة اولى
و الشاي بتاعك في الحفظ و الصون ....افطر بس و تعالى...و عشان خاطرك هيبقى من ابو فتلة و بنعناع كمان....شوفت دلع اكتر من كده...مع انى مش بعملها مع حد....بس الجبن حلو برده...يمكن تنسى فوطة في بطني و لا حاجة تبقى مصيبة
ههههههه
ذاكر كويس بقى عشان متنساش الفوطة في بطن الناس
احم
هو .. هو فنجان القهوة الزيادة هنا بكام ؟
يا realman
بلاش و النبي حكاية المشاركة دي عشان بتعمللي حساسية
و نيجي للمهم...بما ان حضرتك قلت انى اختار الهدية فانا هختار..هختار...هختار
اختار ايه؟
اصلي مش طماعة خالص
طيب اقلك هاتلى عربية...تكون صغنونة كده على قدي...مش قلتلك قنوعة و مش طماعة
بس ياريت تبقى بي ام...و ممكن اتنازل و اقبل ب فولكس فاجن بس تبقى جولف...و اللون بقى مش هنختلف عليه...بس ياريت تركز في الالوان الفاتحة و سيبك من الغوامق خالص
شفت الطيبة و القناعة بتاعتي قد ايه
مش عارفة الناس كده ممكن تاخد عليا او تضحك عليا من كتر طيبتي
يلا اهو الواحد يعمل خير
بس اسمع..العقد يبقى باسمي طبعا عشان انا عارفة الحركات القرعة اللي بتتعمل دي
و استكمالا لطيبتي...انا هعزمك على حسابي...يلا يا سيدي...مش هقسم الحساب معاك و هخليه كله عليا
مش بقلك طيبة
فولكس فاجن انتي عارفا انا لو مش زعلان من اخوانا الالمان من ساعه الحرب العالميه التانيه( علشان مامه هتلي كانت بتعامله وحش )هههههه
كنت جبيهالك يلا بقي خيرها في غيرها انا حولت بس انتي نشلتي غلك اعملك ايه بقي.
وبما ان انا نفذت اتفاقي الدور عليكي العزومه امتا وفين بسرعه.......
يابني انا يهودية
اتفاقية ايه اللي اتفقنا عليها
و بعدين عيد ميلادي ده فات عليه كان يوم...ازاى اعزمك عليه و هو خلاص فات
السنة اللي جاية بقى و عليك خير
منور يابردية
بس مش تقول ياعم كل سنة و انتى طيبة الاول و وبعدين تسأل على الطلبات
اول فنجان قهوة علينا لزوم جر رجل الزبون
منور يا باشا
انفلونزا الطيور ... وانتي بتعملي التورته الفيرس بيتقتل ده بخصوص البيض
أما اللبن فمش مشكله الكلور عادي يعني ماهو بيتحط علي مية الحنفية عشان يعقمها .. يبقي لبن معقم اشطه؟؟
السكر بقا.. اقولك اعمليها بسكر دايت أظن مالكيش حجة
وبعدين حتي لو متنا واحنا بناكل التورته بتاع عيد الميلاد يانهار ازرق هو كااام عيد ميلاااد وااااااحد وعشرين لموني
نموت نموت فداء التورتة
أما البيبسي ياروحي عليه
يا شيخه هشاشة ايه وبتاع ايه اسكتي مش طلعت فشررره
بس انت عارف لو كان عليا كنت جبتهالكوا مش موضوع بخل و لا حاجة
اه انتي هتقوليلي
سيبك انت مفيش احسن من المية...بتاعة الحنفية كمان اصل المعدنية بتكون ملوثة
الله بحب الميه الملوثة جدا
بس هي فين الهدية؟؟؟
سيد يا سيد سيد اللي تحبه سيد
ياسيد ياسيد
الحمد لله نسيت الهدية
هههههههههههههه
تحياتي وكل سنه وانتي بالك اروق
ايه التدبيسة دي
ده انت ناوى على التورتة...يابني بتخن الحاجات دي...و بعدين زي ماقلتك مش عاوزة اخسر زبايني...افرض بقى ان التورتة كانت صلاحيتها منتهية...تروحوا فيها و يجوا يقفلولي الكافيه بالشمع الاحمر و اتسجن
افتكر بعد الفيلم العربي اللي عملتهولك ده تعرف ان مفيش امل في التورتة
و كل سنة و انت طيب
اه قولي كده بقا يعني بخل
مش خوفا علي الزباين
وبعدين مش قولتي انتي اللي هتعملي التورته ايه بقا صلاحيتها منتهية دي
علي اساس ان البيض متباض من تسع سنين
والسكر من 12 سنه وبتاع صح
قبل العيد ما يهل هلاله كل سنه وانتي طيبه ولاحظي اني اول واحد هناكي بقدوم العيد
ده لكرم اخلاقي ولحسن تواضعي ماشربش الشاي اشرب ازوزا انا
بعتلك الهديه علي الايميل يا عم اليهودي.
الف مبروك و عقبال 100 سنه او مليون
زي ما تحبي
كل سنه و مصري كلها بخير
كل سنه و الامه كلها بخير
تحياتي
كل سنة وانتى طيبة
واعملى حسابى فى كحكاية طيب بلاش جاتوه وبتاع
تحياتى
ايه الدلع بتاعك ده
حد قال لك انا عايز اشرب من أبو فتله
أنا عايز شاي صعيدي
تقييييييييييل يعني .. ولا الصبي بتاع القهوه مش بيعرف يعمله ومضيها أبو فتله عشان يريح نفسه؟؟
وبالنسبه للفوطه فمتخافيش
الشاي لو مش علي مزاجي هانساها يعني هانساها
أقول لك حاجه بقه زوري مدونتي بقه وقولي رأيك في القصائد المبعثره بتاعتي
http://qasaed.blogspot.com/
كل سنه وانتي والمسلمون بخير
ده بمناسبة العيد .. متفتكرينيش بتكلم عن عيد ميلادك
كل سنة وانتى طيبة عشان عيد ميلادك و6 أكتوبر ورمضان وعيد الفطر
يللا كله مرة واحدة فى الأوكازيون
أسلوبك لذيذ ما شاء الله
كل سنة وأنت طيبة
عيد ميلاد سعيد
وعيد فطر سعيد
كل سنة وانتي طيبة وهديتك في البوست الأخير عندي عيد سعيد
يا ختى بلا نيلة فرحانة اوى انك بقيتى واحد وعشرين انا بقى تميت الواحد وعشرين من شهر ستة الى فات ومش قادرة اقلك على حالة الياس الى انا فيها وانا شايفة كل صحابى الى اتخطبت والى اتجوزت والى مرتبطة وانا قاعدة زى خيبيتها والى خلصت وبتشتغل وانا قاعدة اقشر بصل
انا حاسة ان انا ضاع من عمرى واااااحد وعشرين سنة عالفاضى معملتش اى حاجة مفيدة فى حياتى
معلش انا عقدتك من اولها بس انا اصل الحوار دة عملى حالة اكتئاب فظيعة عموما كل سنة وانتى طيبة يا قمر ويارب اشوفك فى بيت العدل السنة الجاية وانا وراكى على طول :]:]:]
ايه ده يا لوما...انتى منهم...الناس دول بتوع بيت العدل
انتي قلبتي على ماما كده...و يا بنتي هي البنت مسيرها ايه غير الجواز و مش عارف ايه كانهم لاقينا على باب جامع
خلينا ننعم بحريتنا المؤقتة و عيشة البغددة على رأي ماما...انا يا ستى مش مستعجلة على بيت العدل ده خااااالص
عقبالك انتى كده لما نفرح فيكي قصدي بيكي:D:D:D
إرسال تعليق