اللي منكم بيتفرج على قناة المنار....ده لو لقدر الله يعني بتشوفوا حاجة تانية غير روتانا و مزيكا.....المهم اللي متابع المنار و هي بالمناسبة القناة اللي تابعة لحزب الله....هيعرف ان اليومين دول الاحتفال بذكرى حرب تموز....برده اللي مش عارف تموز ده يبقى ايه ده شهر يوليو....و حرب تموز دي الحرب اللي حزب الله ادى علقة محترمة لاسرائيل و مشاهم قفاهم يقمر عيش بعدها و ده كله كان في 34 يوم بس.... يعني لا سحر و لا شعوذة.....اسرائيل بجلالة قدرها عيطت في 34يوم بس و اشتكت لطوب الارض من اللي عامله فيها حزب الله.....اصلهم بجد بجد ادوهم علقة محترمة.... ربنا يكرمه الشيخ نصر الله بقى..... الراجل ده خلانا نحس ان فيه امل و ان لسه عندنا رجالة و هما بخير..... يعني مين كان يتوقع من البلد اللي جابتلنا اليسا و و هيفا و العالم دول كلهم ان يكون عندهم رجالة....و دي حاجة بصراحة تخللي اي حد يتفائل مرة تانية......يعني عمالين يقولوا اسرائيل و السلام و البتنجان و دول متقدمين و امريكا معاهم و منقدرش عليهم.....و في الاخر حبة شباب مش تبع الحكومة و لا حاجة يعملوا فيهم كده....و بعدين لو اتكلمنا بصراحة بقى مفيش حكومة تقدر تعمل اللي عملوا حزب الله....كانت امريكا علقتها على طول لحد ماتقول حقي برقبتي.....حكومة مين يا عم صلي على النبي.....قال حكومة قال.
صحيح لبنان برده اتبهدلت من الحرب دي و لبنانيين كتيير اوى ماتوا فيها.....بس بصوا للصورة الاكبر...احنا عندنا حد يقدر يقف قدام اسرائيل و يقولها انا اهه.... وريني بقى هتعملي ايه.....واسرائيل وقفت قدام اولمرت و طالبت التحقيق في الحرب دي و اسبابها و التحقيقات قالت ان اولمرت غلطان و الغلط راكبه من ساسه لراسه....أصله كان فاكر ان من كتر ما اسرائيل عاشرت الشعوب العربية بهتوا عليها و انه لما يشتغلهم بكلمتين و يقولهم انه هيقضي على حزب الله هما هيصدقوه و مش هيحسبوه بعدين........ بس لا طبعا دول مش زينا يا بابا و مفيش حد يعرف يشتغلهم دول هما اللي يشتغلوك...... و فعلا الاشتغالة دي مأكلتش مع الاسرائليين و طالبوا اولمرت بالاستقالة.....تخيلوا شعب يطالب كبيره بالاستقالة....جامدة دي....جامدة اوى كمان....بس يا جماعة انا مش عاوزة اتكلم في السياسة نرجع بقى لعمكو نصر الله..... الراجل ده راجل تمام......و بالرغم من ان الامم المتحدة اخدت قرار وقف النار و نزع السلاح من المليشيات و تقصد في الحوار ده حزب الله طبعا.... و قالت ان السلاح يفضل بس مع الجيش اللبناني و طبعا حكومة لبنان عمالة تقول ان حزب الله ده ولائه لسوريا و ايران و انه لازم ميخدش وضعه اوى على الساحة اللبنانية و شوية كلام كده ملوش لازمة.....بس كل الحوارات دي مخلتش الشيخ نصر الله يبيع القضية....ابدا....الراجل لسه متمسك بالقضية بتاعته و قال ان حزب الله مش هينزع سلاحه طالما فيه عدوان و خطر اسرائيلي محيط بلبنان...... يعني الراجل نفض لكلام الحكومة و حواراتها الفاشلة دي و مهمهوش كلام كل الاخوة العرب اللي قالوا ان حسن نصرالله ورط لبنان في حرب مش قادرة عليها و دمر البنية التحتية و قتل مدنيين .....اهو ده بقى حجة البليد.....عشان الناس متحاكمهمش و يقولوا طيب ليه انتوا كمان متعملوش زيهم و هما احسن مننا في ايه و ليه منرجعش الارض اللي سرقوها مننا و كل الحوارات اللي هما عارفينها فقالوا نعيش على الشعب شوية و ناكله البلوظة قال يعني فاكرين ان الناس لسه هبلة و عبيطة و متعرفش امتى بيضحك عليها.....يلا خلينا ساكتين و ربنا يهديهم
و الف الف مليون مبروك للذكرى المشرفة دي يا شيخ نصر الله و الله رفعت راسنا يا راجل.
هناك تعليقان (٢):
awalan mabroouk ya mony 3al blog el gedeed , and for the topic ana shayfa ma3 e7terame l nasrallah allah yer7amo en osloobo 7ata law kan rade3 l israel howa oslooob 3'alat l2an el belad m3adetsh btsbt tfawokha bel 3onf wel 7arb, walla eh ya 7adret el e3lameya, fe wasa2el tanya kteer aksar beeha mana7'er 7'esme men 3'er ma el 3alam koolo yo2af dedde w yet3atef ma3 israel w yerga3o y2olo 3aleena erhabyeen, 7'aleena bas n7el moshkelet el zeyada el sokaneya w el talawos , walla dol kaman han2'ol en israel heya elle etsabebet feehom!!!!! w salam
اولا الله يبارك فيكي و برده مقلتيش اذا كان عجبك و لا لا
اما حكاية ان حسن نصرالله غلطان دي انتى عندك حق فيها لان فعلا انا مش بحب اسلوب العنف بس على راي اللي قال ما اخذ بالقوة لا يسترد الا بالقوة
و اسرائيل كانت مبرطعة في لبنان و عاوزة اللي يلمها
لو كان فيه وساءل كتير زى ما انتى قلتي و انا موافقاكي على فكرة في ده....لكن الوسائل الكتير دي مش نافعة خالص...لو كانت نافعة كان زمانا على الاقل عرفنا نعمل دولة فلسطينية او حتى مشينا اسرائيل من ارض 67...ده غير انى شايفة ان اسرائيل كانت بتتلكك...يعني اول ما لبنان قعدت تزن على خروج القوات السورية من ارضها وا انا قلت ان اسرائيل هتستفرد بيها و ده اللي حصل فعلا...حزب الله خطف كام جندي اسرائيلي و ده عادي يعني بيحصل...اولمرت بقى ماصدق و قال انه هيقضي على حزب الله و بدأ الحرب...فحزب الله مسكتش و دافع عن نفسه...يعني اللي يبص للحرب دي هيلاقي ان حزب الله مش هو اللي كبرها..ده اولمرت و احلامه العريضة هما اللي كانوا السبب فيها.
و بعدين تعالي هنا...مش انا قلت محدش يختلف معايا...جتلك منين الجرأة انك تعترضي على كلامي...ناوية تروحي تصيفي ورا الشمس و لا ايه;P
إرسال تعليق