يا مواطن طظ فيك...برده كلام الحكومة هيمشي عليك

انا بس عاوزة افهم حاجة... زمان الواحد كان اول ما يسمع عن المظاهرات يجي في باله مظاهرات من نوع الاستقلال التام اوالموت الزؤام و الليلة دي كلها... ده كان زمان... و قول للزمان ارجع يا زمان
اليومين دول يا خوانا بقيت المظاهرات بنكهة تانية خالص... مش باللمون و النعناع... لكن المظاهرة مبقتش سياسة بس.. المظاهرة بقت على لقمة العيش
اعتصامات عمال غزل المحلة... مظاهرات عمال مش عارف ايه... ده حتى الموظفين الموظفين يا مؤمن بقوا يعملوا مظاهرات....و مش بيطالبوا بتغيير النظام السياسي او بتشكيل حكومة جديدة....الناس عاوزة تأكل ولادها...الناس عاوزة تزور الجزار مرة واحدة كل شهر....
و بما ان المواطن المصري دايما راضي بقليله.... و دايما يصبر نفسه او بمعنى اصح يشتغل نفسه بالامثلة من عينة بصلة المحب خروف و لقمة هنية تكفي مية و مد لحافك على قد رجليك و ربنا مبينساش حد... و كل الاشتغالات اللي الناس اكتشفوا انها مش جايبة همها ففرقعوا...انفجروا طرشقوا....البصل بقى بتلاتة جنيه و الناس اصلا مش طايلاه عشان تتخيل انه خروف و العيش المدعم ابو شلن بتقف عليه طابور ساعتين عشان تاخده ده ان لاقيته يبقى هتجيب لمية ازاى مش عارفة و اللحاف اصلا مش موجود عشان نمده لحد ركبنا مش رجلينا و ربنا مبينساش حد بس الظاهر ان عبيدوا بينسوا....اكتئبت و لا لسه شوية...استنى التقيل ورا
لما الناس قالوا يعملوا مظاهرات و اعتصامات عشان يعرفوا الناس الكبار مشاكلهم...قال يعني هما مش عارفنها... افتكروا ان مشاكلهم هتتحل...مش بقلك ناس طيبة....و بعد الهليلة و الزيطة اللي عملوها طبعا جالهم وعد بحل مشكلتهم...و الحل ان مرتبتهم هتزيد....و ابقى قابلني بقى... العمال لحد دلوقتي في منهم مصرفش حاجة و اللي صرفوا اخدوا 30 و لا 40 جنيه...متخيل انك تعمل اضراب كام يوم و تعرض اهلك و نفسك للبهدلة و ده كله على 40 جنيه...طيب لو قلنا ان مرتبات العمال ضعيفة و ان 40 جنيه ممكن تكون بالنسبة ليهم نواية تسند الزير و انها حاجةمش بطالة ... تقول ايه عن الموظفين اللي كانوا بيطالبوا ان مرتباتهم تزيد من 400 جنيه لالفين و تلاتة عشان يتساووا بزمايلهم... و اخدوا كام في لااخر... كام بمبة كده من الحجم العائلي...وعدوهم انهم يزيدوا 20% ... يعني يعني 80 جنيه...لا كتير كده يا جماعة...هيعملوا بيهم ايه و لا ايه... طب ده بقى على اساس ايه...يعني لما يبقى واحد بيطلب حقه انه مرتبه يوصل لالفين جنيه و بعد البهدلة يوصل ل 480...ده اسمه ايه بقى؟!...اكيد دي طريقة للحكومة عشان تربي الناس...بيفكرونى بماما لما بحاول اعمل ثورة ساعات تاخدني على قد عقلي و تقوللى حاضر و بعدين ادي وش الضيف... في المشمش يعني ... يعني كلام الحكومة ماشي ماشي...بما انها ادرى بمصلحتنا و كمان محدش يعرف يلوي دراعها...اقصد ماما يعني متفهموش غلط